DILI, 09 agostu 2023 (TATOLI)—Ajénsia Ilimanu Holding Limitada halo ona rekrutamentu ba joven timor-oan na’in-60 resin hodi tuir treinamentu intesivu molok koloka bá serbisu iha Polándia.
“Joven hirak ne’e sei tuir treinamentu intensivu iha programa lima hanesan ospitalidade, otelaria, soldajen, agrikultura no motorista, molok sira bá serbisu iha Polándia,” Diretór Ajénsia Ilimanu Holding Limitada, João Travolta, informa ba Agência Tatoli, iha ninia knaar fatin, Hudi-laran, kuarta ne’e.
Notísia relevante : SEFOPE sei kria mekanizmu disiplinár ba traballadór sai hosi sistema
Ajénsia halo ona preparasaun treinamentu intensivu iha abríl 2023, simu ona delegasaun hosi Polándia no konsege hetan kouta espesiál.
“Joven ne’ebé hetan ona oportunidade, daudaun tuir hela treinamentu maibé sei hili uluk na’in-11 bá serbisu iha Polándia, restu seluk hein fali etapa tuir mai,” nia akresenta.
Iha fatin hanesan, joven hosi munisípiu Ermera, Domingos Gonçalves, ne’ebé nu’udar kandidatu traballadór, hateten, nia parte hetan oportunidade tanba hahú rejistu iha fulan-juñu liubá.
“Dokumentu sira ne’ebé ha’u prepara atu tuir rejistu mak hanesan atestadu médiku, sertifikadu ka diploma eskola nian, kaderneta, pasaporte, sertifikadu esperiénsia serbisu no seluk tan,” nia dehan.
Ajénsia Ilimanu Holding limitada harii iha agostu 2022 no hetan finansia hosi Diretoria formada Rogério Tiago Lobato, Ricardo Nheu no João Bosco, ne’ebé ajénsia ne’e rasik hetan ona lisensa hosi Servisu Rejistu no Verifikasaun Emprezariál, Institutu Públiku, (SERVE,I.P).
Jornalista : Arminda Fonseca
Editora : Julia Chatarina
