ESJP Suai sai vensedór iha kompetisaun diskursu públiku nivél ensinu sekundáriu
COVALIMA, 10 agostu 2023 (TATOLI)–Estudante Eskola Sekundáriu Jerál Públiku Suai (ESJP) sai vensedór dahuluk iha kompetisaun diskursu públiku nivél ensinu sekundáriu iha munisípiu Covalima ho valór 273.
Notísia Relevante: Loron internasionál juventude enkoraja joven partisipa iha dezenvolvimentu sustentavél
Kompetisaun diskursu públiku ne’e, organiza hosi Centro Juventude Covalima (CJC) hodi komemorasaun loron Internasionál Juventude ho tema “Abilidade verde ba juventude iha Dezenvolvimentu sustentavél ba mundu” ne’ebé mundu selebra kada loron 12 agostu.
Ekipa juri fó sai rezultadu bazeia ba avaliadór aprezenta kompetisaun diskursu públiku nivél ensinu Sekundáriu katak Eskola Sekundáriu Públiku Suai sai vensedór dahuluk, vensedór daruak mak eskola Sekundáriu Ave Maria Suai (ESCAM) ho valór 260 no vensedór datoluk mak eskola Sekundáriu jerál públiku Zumalai ho valór 232.
“Rezultadu ne’ebé ita hetan ne’e hosi ekipa juri hala’o avaliasaun ba ita-boot sira-nia aprezentasaun iha kompetisaun diskursu públiku,” Reprezentante ekipa juri hosi Forsa Humanista Covalima, Paulos de Araújo, lee sai rezultadu, iha salaun CJC, Kampung Baru, kinta ne’e.
Tanba ne’e, nia mós husu ba estudante sira tenke kontinua esforsu nafatin no ba estudante ne’ebé sai vensedór oinsá mak kontinua bele hadi’a di’ak liután.
Ekipa juri ba kompetisaun refere, mak juri dahuluk hosi Board Centro Juventude Covalima, Alumi Parlamentu Foinsa’e iha Covalima no juri ba datoluk hosi Forsa Huminista Covalima.
Diretór Ezekutivu, Calistro Leita Gusmão, hateten Centro Juventude Covalima realiza atividade kompetisaun diskursu públiku nivél sekundáriu iha ámbitu komemorasaun loron internasionál ba juventude hodi fó oportunidade ba estudante sira bele espresa sira-nia prespetiva kona-ba sira-nia koñesementu nee’ebé durante ne’e aprende liuhosi ensinu aprendizajen.
Iha kompetisaun diskursu públiku nivél ensinu sekudáriu ne’e, Centro Juventude Covalima prepara prémiu osan ba vensedór dahuluk to’o datoluk bazeia ba matadalan ne’ebé iha.
Ho nune’e, Centro Juventude Covalima deside ona valór orsamentu ba estudante ne’ebé sai vensedór dahuluk sei hetan $250.00, vensedór daruak hetan $150.00 no vensedór datoluk hetan osan hamutuk $100.
Tuir planu, prémiu vensedór ba kompetisaun diskursu públiku sei entrega iha loron 12 fulan agusto tinan 2023, tanba iha loron refere mak mundu tomak selebra Loron Internasionál ba Juventude.
Entretanu, iha ámbitu komemorasaun loron internasionál ba juventude Centru Juventu Covalima realiza atividade sira hanesan semináriu, doasaun rsan, jogu amizade, komepetisaun diskursu públiku nivél ensinu sekundáriu, limpeza jerál, vizita fatin auto empregu hosi CJC, kompetisaun tebe orijinál, marsa saudavél, sa’e bua, dada tali no halai taru karon.
Jornalista : Celestina Teles
Editór : Cancio Ximenes
