BOBONARO, 10 agostu 2023 (TATOLI) — Sasán nesesidade bázika liuliu foos nia folin sa’e iha merkadu sentrál postu administrativu Bobonaro Vila, munisípiu Bobonaro.
Na’in ba Loja Mega-Bas, Anita de Jesus, esplika, foin lalais ne’e fa’an foos kilograma 20 saka ida ho presu dolar $12 no saka kilograma 25 ne’e $14,50.
Notísia relevante: Komisaun C konkorda Governu revee taxa impostu seletivu normaliza presu sasán
“Agora sa’e hotu, tanba ami hola iha Dili kilograma 20 ne’e $16,50, ami fa’an $17,50, ami hetan de’it $1, tanba dook konta ho mina nian de’it mós ami gasta $200, ne’e mak sa’e ne’e, sé lae ami fa’an bainbain,” nia informa ba Tatoli, iha merkadu Bobonaro Vila, kinta ne’e.
Nia dehan, presu refere sa’e kedas hosi empreza distribuidór sira iha kapitál Dili.
“Sira dehan tanba taxa karun, entaun ami mós hola de’it ona, sasán iha loja mós laiha, foos ne’e ami sosa saka 200 ema lakohi, só ganden ho masin-midar mak bele, foos 150 no masin-midar 50, ema foin bele tula,” nia dehan.
Enkuantu kona-bá bebidas naun-alkolikus hanesan delos no seluk tan srta deside la fa’an tanba presu iha Dili sa’e to’o $13 kada kaixa.
“Ita fa’an mós ema la hola ida, ha’u-nia agora sei barak hela, rai hela ba mós ema husu ba liu de’it,” nia haktuir.
Negosiante kioske Kiik, Filomeno de Jesus Lopes, fa’an foos kilograma 20 ho presu $14 no kilograma 20 ho presu $18,50. Enkuantu folin sasán sira hanesan supermi kaixa ida hasa’e ba $8,50, maibé restante mantein ho presu sira antes.
“Ami mós hola tutan de’it iha Maliana, ema iha ne’ebá hasa’e tiha ne’e atu hlo nusá, ami mós naran fa’an de’it ona, hetan netik $1 ka $2 de’it, ami naran halo de’it ona tanba ami-nia to’os mak ne’e ona,” nia akresenta.
Balbina Soares nu’udar kompradora, sente laiha kbiit atu sosa foos ho presu aas, tanba osan lato’o.
“Ami povu ne’e moris ho to’os de’it foti osan hosi ne’ebé mak atu sosa foos $18 nian ne’e. Ida-ne’e halo ami triste, uluk iha kampaña Governu dehan atu hatún sasán folin, agora sa’e tiha mós nafatin, ami iha Bobonaro ne’e natar mós laiha, atu foti foos iha-ne’ebé tán,” nia hateten.
Xefe suku Mali-lait, Mário de Jesus Carvalho, husu IX Governu atu halo intervensaun ba folin iha merkadu nasionál, liuliu foos, tanba presu sa’e difikulta ba povu kbiit kiik sira.
Nia dehan, negosiante sira Bobonaro hasa’e presu ne’e razoável, tanba kestaun estrada ladi’ak no distánsia.
“Sasán folin ne’e sa’e kedas iha Dili, entaun iha-ne’e mós hasa’e tán, fó impaktu ba ita-nia komunidade sira laiha kbiit atu sosa,” nia preokupa.
Notisia relevante: PD promete sei hamenus taxa nesesidade bázika
Jornalista : Sérgio da Cruz
Editór : Evaristo Soares Martins
