DILI, 10 agostu 2023 (TATOLI) – Sentru Impresaun Comoro falta suratahan atu prodús kaderneta eskolár ba estudante sira iha eskola bázika no sekundária jerál, informa Diretór Nasionál Impresaun, Januário Viana Mota.
Januáriu Viana Mota relata katak proposta produsaun kaderneta eskolár ne’ebé Diresaun Nasionál Kurríkulu submete ba sentru atu prodús hamutuk rihun 279, maibé sentru responde de’it rihun 84 ne’ebé sei distribiu rihun 14 ba ensinu báziku no rihun 70 ba eskola sekundária jerál.
“Kaderneta eskolár hamutuk rihun 195 sentru labele responde tanba hela de’it sura tahan palet ida ne’ebétenke rezerva ba nesesidade urjente mnistériu nian”, Januário Mota afirma, iha Comoro.
Ba problema menus suratahan ne’e sentru buka ona solusaun hodi aprezenta ona proposta rua ba Ministériu Edukasaun, liuhusi Aprovizionamentu atu loke prosesu konkursu públiku hodi hatama ekipamentu sira ne’ebé sentru presiza.
Proposta ne’ebé sentru submete ne’e bazeia ba orsamentu sentru nian ne’ebé prevee ho montante $885.474. Ba proposta dahuluk sentru husu atu sosa suratahan ho osan ne’ebé prevee $501.450 no proposta daruak ba akizisaun materiál dijitál nian ho orsamentu $383.813.75.
Proposta rua ne’e sentru submete ba Aprovizionamentu entre fulan marsu no maiu, maibé to’o agora sei iha hela prosesu nia laran. Nune’e atividade produsaun ba kaderneta eskolár mós labele la’o no atividade seluk hanesan manutensaun ba mákina sira kontinua la’o, nune’e bele garante nafatin ekipamentu sira.
Diretór-Jerál Administrasaun no Jestaun Finansa, Antoninho Pires, realsa katak proposta husi Sentru Impresaun Comoro nian tama ona iha prosesu. “Daudaun ne’e, Diresaun Nasionál Aprovizionamentu sei prosesa hela. Karik prosesu loos ona maka sei loke konkursu ida atu empreza ne’ebé iha interese bele hatama sira-nian dokumentu hodi tuir konkursu”, afirma.
Notísia relevante: Ministériu Edukasaun sei imprime kaderneta eskolár rihun 135
Jornalista: Tomé Amado
Editora: Maria Auxiliadora
