Komandu PNTL Covalima enkoraja feto konkorre iha eleisaun xefe suku
COVALIMA, 10 agostu 2023 (TATOLI)–Komandante PNTL, Munisípiu Covalima, Superintendete Calisto Gonzaga, enkoraja feto potensiál Covalima no mane atu kandidata nia-aan, nune’e bele konkorre iha eleisaun xefe suku, ne’ebé tuir kalendáriu sei hala’o iha fulan-outubru 2023.
Notísia Relevante: Deputada PD-FRETILIN enkoraja feto partisipa iha eleisaun xefe suku
“Eleisaun xefe suku hanesan oportunidade boot ba feto no mane maluk sira atu kandidata ita boot sira-nia aan, hodi konkorre iha eleisaun xefe suku. Servisu hamutuk ho Polísia Nasionál Timor-Leste (PNTL), ita harii komisaun kiik hanesan KPK iha suku, nune’e ita-boot sira nia área nafatin hakmatek,” Superintendete Calisto Gonzaga hateten liuhusi nia diskursu iha resintu edifísiu CNE, Tabakolot, sesta ne’e.
Komandante ne’e hateten, Polísia Nasionál Timor-Leste (PNTL) hanesan instituisaun ida-ne’ebé tenke garante ema-hotu livre no justu, ema hotu partisipa atu hatudu Estadu de Direitu Demokrátiku nia lala’ok mak ida-ne’e.
“Ita hili, ita-nia líder komunitária enkamiña ba ema hotu, ita atu kontribui, livre, hahú prosesu oinsá atu kandidata aan, oinsá atu tama STAE ne’ebé sei estabelese no oinsá hosi CNE sei valida, nune’e ema ne’ebe hetan lejítidade bainhira hetan validasaun hosi tribunal,” nia hateten.
Regra prosedimentu hanesan estadu direitu demokrátiku, ida-ne’e hanesan matadalan nune’e nu’udar sidadaun tenke kontribui ba dezenvolvimentu iha konstrusaun Estadu.
Munisípiu Covalima tenke orgullu, tanba iha dezenvolvimentu hanesan posu mina no auto-estrada no sidadaun sira hotu hakarak kontribui ba polítika Governu nian.
“Ita orgullu maibé ita tenke servisu hamutuk no servisu ho ekipa ne’e importante tebes,” nia dehan.
Jornalista : Celestina Teles
Editór : Cancio Ximenes
