Deputada PD-FRETILIN enkoraja feto partisipa iha eleisaun xefe suku
DILI, 08 agostu 2023 (TATOLI)—Membru Parlamentu Nasionál (PN), liuhusi Deputada bankada Partidu Demokrátiku (PD), Teresa Gusmão, enkoraja feto maluk sira iha Timor-Leste atu partisipa kompete iha eleisaun líder komunitáriu ne’ebé sei realiza iha tinan ne’e.
Notísia Relevante: PPN Maria Fernanda Lay sai feto exemplár ba feto Timor-Leste
“Korajen no apoiu feto maluk sira atu bele asesu ba vida polítika ba lideransa atu bele foti desizaun, Ne’ebé, labele halo diskriminasaun ba ita-nia maluk feto sira liuliu labele hasai deklarasaun iha públiku atu diskrimina feto maluk sira, Tanba, atu feto ka mane, ita hamutuk mak bele hala’o dezenvolvimentu no sai parseiru,” Deputada Teresa Gusmão hateten ba jornalista sira iha uma fukun PN, tersa ne’e.
Nia enkoraja feto maluk sira iha Timor-Leste, atu partisipa hodi kompete iha eleisaun líder komunitáriu ne’e.
Deputada FRETILIN, Lídia Norberta, hateten iha konstituisaun artigu 16 no 17 garante ko’alia kona-ba igualmente mane no feto, iha ne’eba hateten katak feto ho mane iha direitu hanesan iha vida sosiál, polítika no ekonómika.
Iha konstituisaun artigu 16 (Universalidade no igualdade) ne’e haktuir;
- Sidadaun hotu-hotu hanesan iha lei nia oin, no mós iha direitu no obrigasaun hanesan.
- Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál.
Aleinde ne’e, iha konstituisaun artigu 17 (Igualdade ba feto no mane) ne’e hateten; Feto no mane iha direitu no obrigasaun hanesan iha moris família, kulturál, sosiál, ekonómiku no polítiku nia laran.
Nune’e mós, nia hateten, konstituisaun artigu 46 ko’alia kona-ba partisipasun polítika sidadaun hotu-hotu iha direitu hanesan atu deside ba vida polítika.
“Entaun, kuandu temi ona sidadaun hotu-hotu ne’e feto ho mane, konstituisaun garante ida-ne’e, ho ida ne’e mak partisipasaun feto iha polítika Timor importante tebes, ne’e la’ós foin mosu ohin loron, dezde luta rezisténsia kedas,” nia hateten.
Iha konstituisaun artigu 46 (Direitu ba partisipasaun iha polítika) haklaken;
- Sidadaun hotu-hotu iha direitu atu partisipa, hosi nia rasik eh liu hosi reprezentante ne’ebé hili tiha ona tuir demokrasia, ba vida polítika no ba asuntu públiku nian iha rai laran.
- Sidadaun hotu-hotu iha direitu atu halo no partisipa iha partidu polítiku sira.
- Konstituisaun no organizasaun ba partidu polítiku sira lei maka regula.
Nune’e, nia hateten, Timor-Leste tenke kontinua ho ida-ne’e ba oin no enkoraja feto maluk sira atu partisipa iha eleisaun líder komunitáriu ne’ebé sei realiza iha tinan ida-ne’e nia laran.
Jornalista : Nelson de Sousa
Editór : Cancio Ximenes
