DILI, 11 agostu 2023 (TATOLI)—Komisáriu Alfándega/Autoridade Aduaneira (AA), José António Fátima Abílio, konsidera sigaru ne’ebé kontinua sirkula iha territóriu laran liuhosi atividade ilegál tanba durante ne’e ekipa responsável sira sempre tau-matan ba pontu entrada sira.
“Ita nafatin halo kontrolu ba pontu entrada sira, maibé laiha sidadaun ida mak hamata sigaru ilísitu sira liuhosi pontu entrada, sigaru ne’ebé daudaun kontinua sirkula iha kapitál Dili inklui territóriu laran ne’e hosi atividade ilegál, ne’ebé ita-nia komunidade balun hatama liuhosi dalan korta (jalan tikus). Tanba ne’e atu kombate ida-ne’e la’ós ami mesak maibé hotu-hotu nia kontribuisaun,” Komisáriu Alfándega hateten ba Agência Tatoli, via telefónika, sesta ne’e.
Kestaun sirkulasaun sigaru ilísitu sai mós preokupasaun deputadu bankada KHUNTO, Luís Roberto, ne’ebé husu ba Alfándega no entidade relevante atu kontrola másimu sigaru ne’ebé kontinua sirkula maka’as iha territóriu laran.
Notísia relevante : Deputadu KHUNTO husu Alfandega kontrola sigaru ilegál iha liña fronteira
Tuir José António, durante ne’e laiha sidadaun ida hatama siagaru ilísitu liuhosi pontu entrada sira. Nune’e, atu kombate aktu ilegál sira la’ós hosi parte Alfándega rasik, maibé presiza ekipa konjunta ne’ebé envolve Unidade Polísia Fronteira (UPF), Unidade Polísia Marrítima (UPM), no seluk tan tanba Alfándega laiha fasilidade sufisinte atu halo kontrolu.
“Atu estabelese ekipa konjunta presiza orsamentu no fasilidade hodi organiza ekipa atu halo kontrolu, tanba daudaun ne’e Alfándega só bele halo kontrolu iha pontu entrada sira maibé sigaru tama liu tiha mai, ida-ne’e kompeténsia Autoridade Inspensaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P),” nia akresenta.
Komisáriu dehan, razaun sigaru kontinua sirkula tanba komunidade balun menus konsiénsia halo atividade ilegál.
“Ezemplu komunidade balun iha área fronteira terrestre halo finje ba to’os maibé hatama sasán ilegál no área marrítima nian komunidade balun halo finje ho bero tama tasi atu kail ikan maibé hatama sasán ilegál. Situasaun ida-ne’e ema hotu nia kontribuisaun mak bele kombate, Estadu mós tenke tau orsamentu atu apoiu fasilidade ba parte seguransa no Alfándega rasik tanba ita-nia área terrestre no marrítima ne’e luan,” nia tenik.
Jornalista : Arminda Fonseca
Editora : Julia Chatarina
