PNTL la tolera kualkér individu tenta kria instabilidade iha feira Oé-Cusse
OÉ-CUSSE, 11 agostu 2023 (TATOLI – Segundu Komandante Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), Inspetór Xefe, Angelo Quelo, informa, PNTL la tolera kulakér individu ka grupu tenta kontribui kria instabilidade iha ámbitu feira profutu lokál durante loron 21 iha Oé-Cusse Ambeno.
Notísia relevante: RAEOA loke feira ho atividade sia komemora loron FALINTIL no Konsulta Populár
Angelo Quelo, hato’o nia pozisaun ne’e, tanba objetivu hosi feira produtu lokál ne’e, atu komemora loron FALINTIL 20 agostu 1975 da dala-48 no loron konsulta populár 30 agostu 1999 ba dala-24, komunidade no sidadaun hotu hakarak festeza ho laran ksolok.
“Ita hotu nia hakarak durante semana tolu, ita hotu senti ksolok, tanba feira ne’e selebra ita-nia loron istóriku, ema hotu sei mai partisipa, tán ne’e parte seguransa liuliu PNTL, sei la tolera kualkér aktu krime, hodi mai halo barullu ba inan-aman sira nia oin tanba sira mai ho produtu hosi baze,” Angelo Quelo, ko’alia iha ámbitu abertura feira produtu lokál iha Palaban, Oé-Cusse, kinta, kalan ne’e.
Nia informa, eventu ne’e la’os akontese de’it iha Oé-Cusse maibé akontese mós iha territóriu nasionál, hodi komemora loron FALINTIL 20 agostu no loron Konsulta Populár 30 agostu.
“Atu dehan de’it katak, komandu PNTL Oé-Cusse halo koordenasaun ho forsa F-FDTL ne’ebé mai detaka iha ne’e, forsa Navál no Terrestre, hamutuk ho Polísia Unidade Espesiál, UPF no BOP ne’ebé mak destakadu iha RAEOA, hodi asegura eventu ida-ne’e, hahú loron ohin to’o 31 agostu,” nia afirma.
Pontu rua de’it hakarak hato’o bai ta hotu katak, iha feira sempre akontese di’ak no aat, di’ak ne’e mai hosi ida-ne’ebé, di’ak ne’e mai hosi alkohol ne’ebé maka sempre prejudika ita-nia movimentu ba ita-nia vendedór sira, hala’o hela sira-nia atividade negósiu no mós animasaun sira-ne’ebé maka hahú ohin to’o loron determinadu.
Segundu, problema pesoál ne’ebé maka infrenta iha nia pesoál no fatin seluk, mai aprezenta ka mai hatudu iha fatin ida-ne’e, situsaun ida-ne’e mak sei halo ita-nia feira ne’e dalaruma la’o ladún hakmatek.
“Maibé atu dehan de’it katak, forsa seguránsa sei apoia másimu durante oras 24 iha fatin ida-ne’e to’o remata, zero toleránsia ba pesoál ne’ebé mak hakarak mai estraga ka mai halo barullu iha durante feira ne’e la’o, ita sei halo patrulla hodi kontrola ba feira ne’e nia movimentu, nune’e asegura sidadaun hot-hotu iha Oé-Cusse ne’ebé hakarak mai partisipa hodi festeza eventu ne’e ho laran ksolok,” nia apela.
Jornalista: Abílio Elo Nini
Editór: Evaristo Soares Martins
