DILI, 11 agostu 2023 (TATOLI) – Jerente Programa ba HIV-SIDA moras hadaet hosi relasaun sexual, sifilis no hepatitis, Bernardino da Cruz, rekorda tuir dadus ba kazu HIV-SIDA iha Timor-Leste rejista hamutuk ema 1849.
“Tuir dadus ne’ebé ami simu hosi sentru saúde sira iha teritóriu nasionál hamutuk ema na’in-1849 mak sofre ba moras HIV-SIDA, maibé ami nafatin halo validasaun karik kazu ruma sei iha karik sei atualiza”, Bernardino dehan ba jornalista-sira iha edifísiu Servisu Autónomu Medikamentu Saúde (SAMES) Kampung Alor, ohin.
Aleinde ne’e, ba kazu sifilis iha tinan 2023, iha teritóriu nasionál rejista hosi sentru saúde sira hamutuk ema na’in 300-resin.
“Kazu sefilis, kada tinan ita rejistu 300-resin, ne’e ita hetan hosi sentru saúde sira iha timor laran tomak”, nia dehan.
Tuir nia, atu prevene moras sira ne’e, Ministériu Saúde (MS) fó ona treinamentu ba parteira sira iha postu saúde sira iha área rurál atu bele teste ba populasaun sira ne’ebé sofre moras HIV-SIDA no Sifilis atu bele halo tratamentu.
Rapid Teste Kits ne’ebé iha postu saúde sira iha suku sira nia kualiade 98%, kualiade no Teste Kits sira ne’e hetan aprovasaun hosi Saúde Mundiál.
“Uluk programa ne’e hahú, ita to’o de’it iha sentru saúde sira maibé iha tinan kotuk ita fó ona treinamentu ba parteira sira iha postu saúde sira iha munisípiu to’o suku sira atu iha sira-nia fatin bele halo teste rápidu ba HIV-SIDA no sifilis dala ida atu deteta liuba labarik no inan isin rua sira atu bele halo tratamentu ne’ebé própriu atu labele iha transmisaun, entaun ita iha Rapid Teste Kits ne’ebé kualidade atu halo teste iha munisípiu sira hotu”, nia esplika.
Atu prevene moras HIV-SIDA, primeiru tenke iha nia koñesimentu, daruak sira tenke hadook an ransu livre no seksuál livre, datoluk labele ransu ho seksuál livre no priobilistiva.
Priobilistiva bele utiliza kualker tempu, nune’e virus labele kona, agora daudaun Institutu Kombate HIV-SIDA promove liu nasional priobilistiva.
Tanba ne’e, virus ne’e tinan-tinan aumenta kuaze ema 200 ba leten no ema 200-300 impatadu hosi HIV-SIDA iha Timor-Leste.
Notísia relevante : Dadus HIV-SIDA iha Timor-Leste hamutuk 1,582
Infografia: MS rejista pasiente HIV-SIDA 1.464, mate na’in-234
MS husu ema ho HIV-SIDA “labele moe” bá sentru saúde
Jornalista: Hortencio Sanchez
Editór : Zezito Silva
