iklan

NASIONÁL, HEADLINE, POLÍTIKA

Xanana husu entidade Estadu servisu didi’ak iha prosesu sai membru plenu direitu ASEAN

Xanana husu entidade Estadu servisu didi’ak iha prosesu sai membru plenu direitu ASEAN

Primeiru Ministru, Kay Rala Xanana Gusmão. Imajen Tatoli/Egas Cristóvão

DILI, 11 agostu 2023 (TATOLI)–Primeiru-Ministru (PM), Kay Rala Xanana Gusmão, husu ba entidade Estadu hotu atu servisu didi’ak durante prosesu admisaun Timor-Leste sai membru plenu direitu Asosiasaun Nasaun Sudeste Aziátiku (ASEAN, sigla inglés).

“Komemorasaun ne’e hodi fó hatene ba ita katak ita prepara-an hela atu tama iha ASEAN, ne’e duni husu ita hotu servisu didi’ak bainhira sai membru ASEAN, ita mós partisipa iha dezenvolvimentu iha rejiaun ne’e,” Xanana hateten bainhira partisipa iha komemorasaun ‘ASEAN Day’ ba dala-LVI ho tema ‘Epicentrum of Growth’ ne’ebé hala’o iha Embaixada Filipina, Farol, sesta ne’e.

Xefe Governu rekoñese katak foin ba dahuluk partisipa iha komemorasaun loron ne’e iha Timor-Leste.

“Ha’u atu dehan de’it katak ha’u sente kontente tebes tanba foin primeira-vez ha’u partisipa komemorasaun ne’e, sira komemora dala-hitu ona, iha Dili tinan-tinan, ne’ebé ha’u kontente hasoru maluk sira hosi ASEAN,” nia akresenta.

Notísia relevante : Xanana rekoñese envolvimentu ASEAN ba dezenvolvimentu no prosperidade povu iha rejiaun

ASEAN harii iha loron 08 agostu 1967 iha Bangkok, Tailándia, ho asinatura deklarasaun ASEAN (Deklarasaun Bangkok) hosi Fundadór sira hosi Indonézia, Malázia, Filipina, Singapura no Tailándia.

Tinan balun molok Brunei Darussalam tama iha loron 07 janeiru 1984, Vietname iha loron 28 jullu 1995, Myanmar iha loron 23 jullu 1997, no Kambódia iha loron 30 abríl 1999.

Iha tinan 2003, asosiasaun ne’e lansa Komunidade ASEAN bazeia ba pilár tolu hanesan Komunidade Seguransa, Komunidade Ekonómika no Komunidade Sosiál-Kulturál ASEAN.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!