Sai Sistema, PM Xanana husu traballadór tenke fila mai Timór
DILI, 12 agustu 2023 (TATOLI)- Primeiru-Ministru, Kay Rala Xanana Gusmão, husu ba traballadór timor-oan sira ne’ebé servisu iha rai-li’ur hanesan Austrália no Koreia-Súl tenke fila fali mai Timór.
“Kuandu ilegál tenke fila”, Xanana hateten bainhira vizita ba Sentru Nasionál Formasaun Profisionál SENAI Becora, sabádu ne’e.
Biban hanesan, Sekretáriu Estadu Formasaun, Profesionál no Empregu, Rogério Araújo Mendonça, rezeita katak traballadór Timoroan sira balun iha Austrália no Koreia Súl ne’e ilegál, maibé sira sai de’it hosi sistema.
“Ita labele ko’alia ita-nia maluk Timoroan sira ne’e ilegál maibé sira sai husi sistema, ne’e iha razaun ida katak, iha situasaun COVID-19 aviaun labele mai ita-nia rain nune’e mós hosi ita-nian ba, entaun joven sira ne’ebé ba serbisu liuhosi programa Seasonal Worker ne’e servisu ida ho tempu-badak durasaun fulan-neen de’it entaun iha tempu ne’ebá sira-nia kontratu hotu ona ai-fuan mós lafuan ona automatikamente sira ba fali buka serbisu balun hodi selu fali fatin ne’ebé sira hela no haruka mai sira-nia família iha Timór”, Sekretáriu Estadu klarifika.
Governante ne’e akresenta, atensaun Governu nian ba traballadór hotu iha hanesan, nune’e informasaun sira ne’ebé espalla katak traballadór ne’ebé sai hosi sistema bainhira hetan dezastre ruma ka mate Governu la tau importánsia ba ida-ne’e laloos.
“Ligadu ho traballadór na’in-rua mate iha Koreia Súl ne’e aban (domingu) to’o ona Timór. Governu no família halo ona koordenasaun no prosesu hotu trata loos ona hodi lori sira-rua nia isin mai hikas sira-nia rain”, nia tenik.
Ezekutivu ne’e dehan, Governu halo ida-ne’e ho razaun katak, traballadór sira ne’e molok sira sai hosi Timór ba servisu iha Koreia Súl no Austrália iha akordu entre Estadu ho inan-aman, no akordu entre Estadu ho Estadu.
“Ne’ebé sira hetan dezastre ita-nia adidu traballdór no Embaixadór iha ne’ebá servisu hamutuk ho Governu Koreia nian hodi lori sira fila”, tenik.
Notísia relevante:Deputadu FRETILIN husu Governu solusiona traballadór timoroan sai hosi sistema
Jornalista : Antónia Gusmão
Editór : Rafael Ximenes de A. Belo
