Deputadu FRETILIN husu Governu solusiona traballadór timoroan sai hosi sistema
DILI, 07 agostu 2023 (TATOLI)—Deputadu hosi bankada Fretilin iha Parlamentu Nasionál (PN), Florentino Ximenes ‘Sinarai, husu IX Governu liuhosi ministéiru tutela atu solusiona traballadór timoroan sira-ne’ebé ba serbisu iha Kórea Súl no Austrália ne’ebé sai ona hosi sistema.
Notísia Relevante: Traballadór na’in-rua mate iha Koreia Súl sees ona hosi sistema
“Ita-nia traballadór sira ne’ebé sai hosi sistema barak tebes iha Kórea no Austrália, Tanba ne’e, tambá ne’e husu ba SEFOPE katak, situasaun ida ne’e labele akontese bebe’ik, se lae prezúdika ita-nia maluk timoroan sira-ne’ebé hakarak hetan oportunidade atu ba serbisu iha rai hirak ne’e,” Deputadu Sinarai levanta kestaun liuhosi reuniaun plenária PN, segunda ne’e.
Nia hateten, Sekretária Estadu Formasaun Profisionál no Empregu (SEFOPE) liuhosi ninia adidu sira iha nasaun sira-ne’e, presiza reforsa iha kontrolu ho másimu liután.
“Ïta hotu hatene, problema boot traballadór na’in hira ne’ebé sai ona hosi sistema, sorte ita-nia Governu hatán lori sira fila. “Situasaun ne’e akontese beibeik sei prezúdika ita-nia traballadór ne’ebé hakarak mós sai ba rai-li’ur,” nia hateten.
Notísia Relevante: Traballadór timor-oan 333 sai hosi sistema Austrália
Deputada Fretilin, Helena Martins Belo, reforsa tan katak timoroan sira-ne’ebé serbisu iha rai-li’ur atu situasaun saida de’it responsabilidade Estadu nian ne’e perante sidadaun Timor-Leste la’ós husik fali responsabilidade.
“Mezmu ita-nia sidadaun sala iha ema rai mós, ita tenke responsabilidade hanesan país soberanu. Tanba ne’e, husu atu oinsá de’it tenke lori fila duni ita-nia oan sira-ne’ebé mate iha ema rain hodi mai hakoi tuir nia lisan,” nia hateten
Vise Ministru ba asuntu Parlamentár, Adérito Hugo, hateten Governu konkorda ho Deputadu sira-nia hanoin tau atensaun no ba oin prevene labele akontese tan.
Notísia Relevante: SEFOPE sei kria mekanizmu disiplinár ba traballadór sai hosi sistema
Jornalista : Nelson de Sousa
Editór : Cancio Ximenes
