Autoridade husu joven Covalima promove kultura
COVALIMA, 13 agostu 2023 (TATOLI)–Reprezentante Administradór Munisípiu Covalima, Francisco de Jesus Alves, husu joven sira atu promove kultura munisípiu Covalima nian hanesan dansa kultura no tebe orijinál, tanba kultura mak Timor-Leste nia identidade.
Notísia Relevante: Loron mundiál Juventude ho tema “Green Skills for Youth”
“Dansa kulturál no tebe orjinál Covalima, hanesan identidade Covalima nian no Timor-Leste ni’an,” Francisco de Jesus Alves hateten liuhosi nia diskursu bainhira partisipa iha loron internasionál ba juventude iha Kampu CJC, Kampung Baru.
Juventude Covalima labele moe atu promove kultura hosi Covalima ba iha nasionál no to’o internasionál, tanba kultura sai hanesan tradisaun Timor-Leste nian.
“Keta haluha ita-nia tais, kaebauk, tebe orijinál dansa tradisionál-sira ne’e, tanba ida-ne’e mak ita-nia identidade mai ita hamutuk hodi promove ita-nia tradisaun Timor-Leste,” nia dehan.
Autoridade Covalima husu joventude atu promove kultura munisípiu Covalima, Centro Juventude Covalima iha nia atividade kompetisaun tebe orijinál ne’ebé aprezenta hosi suku Matai no Oges, postu administrativu Maucatar, munisípiu Covalima hodi komemora loron internasionál juventude ne’e.
Komemorasaun loron internasionál juventude iha loron 12 fulan-agusto ne’e, Centro Juventude Covalima hala’o animasaun ho atividade oioin hanesan, dansa kultura, tebes orijinál dansa modernu no seluk tan.
MJDAK kongratula CJC
Entretantu, Ministériu Juventude no Desportu Arte no Kultura (MJDAK) liuhosi Diretór Nasionál Juventude no Desportu, Jacinto A. Ximenes, kongartula Centro Juventude Covalima (CJC) komemora loron Internasionál Juventude ho atividade no kompetisaun oioin.
“Ita hotu hatene iha Timor-Leste iha loron nasionál barak, maibé asuntu juventude loron nasionál 12 fulan- novembru no Loron mundiál ba juventude ne’ebé ita bolu loron internasionál Juventude ne’ebé monu iha loron 12 fulan-agostu,” Diretór Nasionál Juventude no Desportu, Jacinto A. Ximenes hateten.
Bazeia ba rezolusaun ONU iha tinan 1999 ne’ebé deside ona tinan-tinan sempre komemora loron internasionál ba juventude ne’ebé kada tinan sempre muda tema “Abilidade verde ba juventude iha Dezenvolvimentu sustentavél ba mundu”.
Liuhosi tema ne’e, presiza atu kuidadu ekolójia no meiu ambiénte ne’ebé iha, tanba komemorasaun loron internasionál juventude hahú hala’o atividade iha loron 08 to’o loron 12 fulan-agostu.
Reprezentante Administradór Munisípiu Covalima, Francisco de Jesus Alves hateten, komemorasaun loron internasionál Juventude iha munisípiu Covalima hala’o atividade hahú loron 08 to’o loron 12 fulan-agostu.
“Komemorasaun loron internasionál Juventude iha munisípiu Covalima ita hala’o atividade lubuk-ida hala’o atividade ne’ebé pozitivu ba joven-sira atu promove talentu, kapasidade no atu hametin joven- sira nia fraternidade hodi hadok aan atividade negativu bele estraga imi-nia futuru,” nia hateten.
Autorudade Covalima hato’o agradesimentu ba Governu hodi fó fiar ba munisípiu Covalima liuhosi Centro Juventude Covalima tinan ne’e, hodi komemora loron internasionál ba juventude iha Covalima.
“Ita agradese ba Ministériu Juventude Desportu Arte no Kultura (MJDAK), tanba fó fiar ba Covalima hodi komemora loron internasionál juventude iha Covalima” nia dehan.
Diretór Ezekutivu Centro Juventude Covalima, Calistro Leite Gusmão, hateten Governu fó fiar ba CJChodi komemora loron internasionál juventude hanesan privileiju boot ba munisípiu Covalima.
“Ita-nia Governu liuhosi Ministériu Juventude Arte no Kultura servisu hamutuk Organizasaun Internasionál UNFPA ne’ebé organiza hosi Centro Juventude Covalima, komemora loron internasionál juventude hanesan prievileiju boot ba ita Covalima, tanba CJC hetan fiar hosi Governu,” nia dehan.
Komemorsaun ida-ne’e, fó atensaun espesiál ho tema ne’ebé iha ho nia objetivu atu hasa’e konxiénsia no promove sensibilizasaun prátika sustentavél entre joven ira no partisipasaun, ho atividade ne’ebé relasiona ho sustentavél ambiéntál no dezenvolvimentu komunitária no promove ativu hosi foinsa’e sira iha dezenvolvimentu kona-ba sustentabilidade.
CJC realiza atividade oioin ne’ebé hetan apoiu orsamentu hosi Ministériu Juventude no Desportu Arte no Kultura (MJDAK) hamutuk $5000 no apoiu hosi Organizasaun Internasionál UNFPA hamutuk $4000.
Notísia Relevante: Loron internasionál juventude enkoraja joven partisipa iha dezenvolvimentu sustentavél
Jornalista : Celestina Teles
Editór : Cancio Ximenes
