Autoridade Bibileo Viqueque loke kopa futeból Kararas hodi komemora loron istóriku
VIQUEQUE, 14 agostu 2023 (TATOLI)–Autoridade suku Bibileo hamutuk ho autoridade munisípiu Viqueque, sobrevivente, no abitante lokál, segunda ne’e, loke taxa rotativa kopa futeból Kararas hodi komemora loron levantamentu 08 agostu 1983 no Masakre Tahu Ben 17 agostu 1983 ba dala-40 iha suku Bibileo, postu administrativa Viqueque, munisípiu Viqueque.
Xefe suku Bibileo, Maria Odete dos Anjos, hateten inisiativa ne’e nu’udar aktu ida hodi fó onra no valoriza eroi sira ne’ebé lakon vida iha Timor Leste.
“Bainhira ami loke taxa ne’e hasoru dezafiu oioin. Maski taxa ne’e ita haree la serve, maibé liuhosi atividade ne’e ita fó onra ba matebian sira iha Kararas no matebian sira ne’ebé mate ba rai ida-ne’e atu valoriza sira. Tanba ne’e ha’u husu ba ita hotu katak taxa rotativa Kararas hahú 2016 maibé bainhira mosu COVID-19 atividade ne’e paradu nune’e ami hahú fali iha tinan ne’e,” Autoridade hateten iha kampu Lalerek Mutin, suku Bibileo, domingu (13/08).
Jogu futeból ne’e realiza iha suku Bibileo ho kolaborasaun ho postu no munisípiu Viqueque hodi loke torneiu taxa rotativa Kararas.
“Iha tinan ida-ne’e ami realiza iha suku Bibileo maibé ba tinan oin ami sei entrega ba munisípiu mak organiza fali,” nia akresenta.
Notísia relevante : Abitante Bibileo preokupa ho kondisaun infraestrutura bázika
Ho nune’e, nia husu jogadór sira ne’ebé partisipa taxa rotativa ne’e tenke joga ho fuan tanba taxa ne’e ho ruin no ran, tanba ne’e lakon ka manán tenke simu realidade.
“Ha’u husu ba ita hotu katak jogu ida-ne’e ita nafatin kria unidade no estabilidade. Karik iha problema partikulár labele lori to’o iha jogu ne’e,” Autoridade suku tenik.
Iha fatin hanesan, Prezidente Komisaun Organizadora, Teotonio Sarmento da Silva, informa, orsamentu realiza jogu inklui taxa hamutuk $4.500.
“Jogu rotativa ne’e ami aloka ona $4.500 ba jogu futeból, jogu voliból no futsál totál hamutuk $9.500, maibé atividade rua ne’e sei realiza iha Viqueque Vila,” nia relata.
Taxa rotativa ne’e ba dala-tolu ona, tinan 2023 klube hamutuk 19 maka partisipa iha jugu futeból ne’ebé sei realiza iha loron 13 agustu no sei ramata 17 setembru 2023.
Jogu ne’e hetan apoia hosi Banku Nasionál Komérsiu Timor-Leste (BNCTL, sigla portugés), Telkomcel, FALINTIL-Forsa Defeza Timor Leste (F-FDTL) no Asosiasaun Futeból munisípiu Viqueque.
Jogu ne’e lidera hosi diretór arbitrajen FFTL, ne’ebé jogu abertura entre klube FC 10 de Agostu no FC Tatamou A, ho rezultadu ikus FC 10 de Agostu manán golu 3 ba FC Tatamou A ho golu 2.
Jornalista : Vitorino Lopes da Costa
Editora : Julia Chatarina
