Deputada Cedelizia husu PN hili membru CI foun troka Expedito
DILI, 14 agostu 2023 (TATOLI)-Deputada hosi bankada CNRT iha Parlamentu Nasionál, Cidaliza dos Santos, husu meza PN atu ajenda ona hodi hili membru Conselho de Imprensa (CI) foun ida hodi troka atuál Sekretária Estadu Komunikasaun Sosiál (SEKOMS), Expedito Dias Ximenes.
Notísia Relevante: Expedito submete ona karta rezignasaun ba PN husik kargu Konseleiru CI
“Husu ba meza Parlamentu kona-ba membru konsilleiru ida hosi Conselho de Imprensa, ha’u hanoin atuál ita-nia Sekretáriu Estadu Komunikasaun Sosiál (SEKOMS), Expedito Dias Ximenes, ne’ebé mak uluk nia ba CI hosi reprezenta hosi PN. Agora sai ona membru Governu, ami rona no akompaña katak hatama ona nia karta rezignasaun ba ita PN, hanoin papél ita PN se bele ajenda atu hili fila-fali membru foun ida hodi troka, nune’e labele impaktu ba CI,” nia dehan.
Nia hateten, tanba tuir informasaun ne’ebé rona katak iha membru CI na’in-lima, agora ho auzénsia ho membru ida-ne’ebé ba ona sai membru Governu, entaun impaktu atu foti desizaun.
“Sira iha na’in-lima, agora hela haat de’it, susar tebes ba sira. Hakarak fó hanoin ba PN, ita mak iha dever atu nomea fali ema foun, entaun iha tempu badak bele mós nomea ona hodi substitui,” nia hateten.
Notísia Relevante: Bankada FRETILIN retira kandidatura, KHUNTO propoin Expedito Ximenes ba CI
Deputada hosi bankada Governu ne’e, hato’o mós uluk iha PN bainhira komisaun sira halo fiskalizasaun iha terrenu iha mós akompañamentu hosi mídia emprime no eletrónika sira maibé agora laiha, nune’e husu PN presiza halo koordenasaun ho SEKOMS atu haree.
“Povu ladún akompaña kona-ba atividade fiskalizasaun PN nian, tanba la fó informasaun liuhosi notísia. Tanba ne’e, ami husu ba Sekretáriu Estadu Komunikasaun Sosiál (SEKOMS), hanesan uluk liu PN bele selu kustu viajen ba jornalista sira. Maibé, relatóriu Kámara Konta nian, katak órgaun ida labele selu fila-fali funsionáriu seluk ne’ebé la pertense ba PN, entaun husu PN ho SEKOMS bainhira PN komisaun sira halo fiskalizasaun bele hato’o konvite ba mídia. Se bele, tau mós orsamentu iha pasta ne’ebé hodi uza halo kobertura,” nia dehan.
Prezidente Parlamentu Nasionál, Maria Fernanda Lay, hateten kona-ba atu hili membru CI foun, ida-ne’e tau ona ajenda hein tempu badak bele realiza.
Notísia Relevante: Expedito: “Polítiku mak hili ha’u maibé ha’u la lori mensajen polítika”
Jornalista : Nelson de Sousa
Editór : Cancio Ximenes
