Top

Deputadu CNRT husu ME halo inspesaun ba projetu komunitáriu

Badaen sira konstrui hela Eskola Sekundária Jerál (ESG, sigla protugés) Helio Sancjes Pina “Mau Kruma” Ermera liuhosi projetu komunitáriu. Imajen/Espesiál.

DILI, 14 agostu 2023 (TATOLI)—Deputadu bankada CNRT iha Parlamentu Nasionál, Gabriel Soares, husu Ministéiru Edukasaun (ME) atu halo inspesaun ba implementasaun projetu komunitáriu iha terrenu tanba kontrusaun balun seidauk ramata maibé hal’o ona inaugurasaun.

Notísia Relevante: Projetu komunitáriu 59 iha territóriu nasionál mak seidauk konklui

“Relasiona ho ami-nia fiskalizasaun liga nafatin ho projetu komunitáriu ne’ebé mak Ministéiru Edukasaun (ME) iha orsamentu anteriór hahú hosi tinan 2021-2022 kontinua iha 2023, ita mós haree iha projetu balun hetan ona inagurasaun. Maibé, foin dadaun iha semana kotuk, ami tun ba iha terrenu iha Dili rasik iha eskola 30 Agostu, ami foin asesu hosi ME atu konstrui tan sala sia maibé realidade iha terrenu halo sala ualu de’it maibé inaugura tiha ona. Tanba ne’e, ami rekomenda nafatin ba Ministéiru Edukasaun oinsá orienta ba inspesaun ninian atu bele haree kona-ba konstrusaun ne’e,” nia hateten liuhusi reuniaun plenária PN, segunda ne’e.

Tuir rezulatdu fiskalizasaun ne’e, akontese mós iha eskola 12 Novembru konstrusaun seidauk ramata maibé inaugura tiha ona, maibé konstrusaun ne’e seidauk tau azulezu maibé foin mak fui simentu kahor ho rai-henek de’it.

“Iha eskola balun Planta no Kadernu Enkargu (BoQ) la’o oin ida, konstrusaun la’o seluk hanesan eskola 10 dezembru. Tanba ne’e, husu ba ministéiru edukasaun liuliu parte inspesaun atu tun ba terrenu haree kona-ba projetu komunitária. Tanba, mai husu orsamentu iha ne’e katak ita-nia oan sira presiza tanba alunus balun tuur de’it iha ai-hun mak simu matéria, ita tau orsamentu ida-ne’e iha fundu konsidera transferénsia públika,” nia hateten.

Vise Ministru ba Asuntu Parlamentár, Adérito Hugo da Costa, rejista preokupasaun refere sei enkamiña ba Ministéiru Edukasaun hodi fó resposta.

Jornalista : Nelson de Sousa

Editór       : Cancio Ximenes

 

Publisidade

Leave a Reply

Latest Post

error: Content is protected !!