DILI, 14 agostu 2023 (TATOLI)–Embaixadór Brazíl iha Timor-Leste, Maurício Medeiros de Assis, hasoru malu ho Primeiru-Ministru (PM), Kay Rala Xanana Gusmão, segunda ne’e, hodi ko’alia kona-ba kontinuasaun kooperasaun bilaterál iha área edukasaun, saúde no agrikultura.
“Ho Primeiru-Ministru ko’alia kona-ba posibilidade Timor-Leste no Brazíl halo kooperasaun iha área edukasaun. Brazíl iha ona apoia ba área ne’e iha programa apoia formasaun ba profesór sira, ne’ebé Primeiru-Ministru husu atu kontinua,” Maurício Medeiros Assis hateten hafoin hasoru PM Xanana, iha Palásiu Governu, segunda ne’e.
Notísia relevante : FDCH atribui bolsa méritu ba timoroan 18 estuda iha Brazíl no Portugál
Brazíl mós hakarak apoia Timor-Leste iha área saúde nian, espesífikamente iha produsaun medikamentu.
“Aleinde ne’e ami-rua mós ko’alia oitoan kona-ba agrikultura, ida-ne’e mós programa importante Brazíl nian, hanesan agrikultura no pekuaria, Timor-Leste mós hanesan, setór agrikultura nu’udar setór prioridade Governu nian,” nia reforsa.
Hasoru malu ne’e hamosu serbisu hamutuk ida pozitivu tebes no Xefe Governu husu atu Brazíl reforsa Timor iha área prioridade sira ne’ebé Governu prevee ona.
“Konversa di’ak tebes, povu brazileiru no timorense iha amizade ida di’ak tebes. Tanba ne’e Brazíl sei intensifika kooperasaun ho Timor Leste, no retoma kooperasaun nível ne’ebé iha ona. Biban ne’e ha’u entrega mós dokumentu ba Primeiru-Ministru kona-ba serbisu sira ne’ebé mak Brazíl realiza ona iha Timor-Leste liuhosi kooperasaun bilaterál no planeia realiza iha futuru,” nia subliña.
Biban hanesan, diplomata brazileiru ne’e informa mós katak, ho kooperasaun sira ne’ebé iha, timor-oan kuaze 300 mak durante ne’e estuda iha universidade Brazíl.
Jornalista : Antónia Gusmão
Editora : Julia Chatarina
