iklan

NASIONÁL, HEADLINE, POLÍTIKA

Embaixadór Indonézia no Xanana diskute zona ekonomia fronteira

Embaixadór Indonézia no Xanana diskute zona ekonomia fronteira

Embaixadór Indonézia iha Timor-Leste, Okto Dorinus dada-lia ho Primeiru-Ministru, Kay Rala Xanana Gusmão, iha Palasiu Governu, segunda (14/08/2023). Imajen Tatoli/Francisco Sony

DILI, 14 agostu 2023 (TATOLI)–Embaixadór Indonézia iha Timor-Leste, Okto Dorinus, hala’o reuniaun ho Primeiru-Ministru (PM), Kay Rala Xanana Gusmão, hodi reafirma fali kooperasaun bilaterál entre nasaun rua.

“Ami diskute kona-ba zona ekonomia fronteira, ne’e mós ami sei realiza, agora iha prosesu preparasaun, ekipa hosi nasaun idaidak sei hasoru malu hodi halo diskusaun ba konseitu ne’ebé ita konkorda ona,” Embaixadór Okto Dorinus hateten hafoin hasoru Xanana Gusmão, iha Palásiu Governu, segunda ne’e.

Notísia relevante : Governu TL-RI hahú diskute korridór dezenvolvimentu ekonómia iha liña fronteira

Durante diskusaun parte rua ko’alia mós kona-ba preparasaun serbisu hamutuk nasaun rua ne’e iha tempu tuir mai.

“Ami sei hasa’e liután saida mak durante ne’e halo ona iha kooperasaun bilaterál ne’ebé la’o kleur ona,” nia tenik.

Iha biban hanesan, Embaixadór hato’o felisitasaun ba IX Governu Konstitusionál ne’ebé lidera hosi Xanana Gusmã nian.

“Ha’u hasoru malu ho Primeiru-Ministru hodi hato’o kongratulasaun hafoin sira simu pose kuaze fulan-ida resin ona, antes ne’e ha’u seidauk hasoru tanba fila bá Indonézia,” Diplomata ne’e salienta.

Aleinde ne’e, ekipa parte rua halo hela serbisu ligadu fronteira terrestre.

“Diskusaun negosiasaun fronteira Timor-Leste nian, ekipa hosi nasaun rua mós prepara hela, posibilidade ami sei halais liután prosesu ne’e tanba sei iha sorumutuk hamutuk ekipa rua iha tinan ida-ne’e molok tinan ne’e ramata,” nia adianta.

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!