Governu TL-RI hahú diskute korridór dezenvolvimentu ekonómia iha liña fronteira

DILI, 16 outubru 2022 (TATOLI) – Governu Timor-Leste liuhosi Autoridade Rejiaun Administrativa Espesiál Oé-Cusse no Ambeno (RAEOA), hamutuk ho Governu Repúblika Demokratika Indonézia, hahú diskute  korridór dezenvolvimentu ekonómia iha liña fronteira.

Primeiru Ministru,Taur Matan Ruak, fó ona orientasaun ba Prezidente Autoridade RAEOA, Arsénio Paixão Bano, hodi asume papél xave ba iha grupu traballu hodi diskute ho Governu Indonézia, kona-ba  korridór dezenvolvimentu ekonómiku Timor-Leste ho Indonézia espesiál ba liña fronteira entre Nusa Tengara Timur (NTT) no RAEOA.

“Horisehik iha sorumutu ho Primeiru Ministru, Ha’u ho Governadór Repúblika Indonézia nian Lemhannas, Governadór NTT no emprezáriu Indonézia, ko’alia kona-ba zona free trade. Nune’e ha’u mak asume papél xave ba grupu traballu hodi kontinua diskute dezenvolvimentu korridór ekonómiku Timor-Leste ho Indonézia, espesiál ba NTT no RAEOA,” Prezidente Autoridade RAEOA, Arsénio Paixão Bano, hateten iha Dili, domingu ne’e.

Nune’e, RAEOA ho NTT mós halo ona diskusaun preliminár kona-ba kestaun prátika hanesan restrisaun ne’ebé iha daudaun ba faze fronteira no kestaun seluk ne’ebé permite mobilidade no troka ekonómika di’ak liután iha fronteira.

Enkontru ne’e,  nia dehan hanesan rezultadu di’ak ida hosi kooperasaun entre Estadu Timor-Leste ho Indonézia, tanba iha fulan hirak liubá, Xefe Estadu Timor-Leste, José Ramos Horta enkontru ona ho Xefe Estadu Indonézia, Joko Widodo.

“Enkotru ofisiál ne’e, hanesan pasu importante atu servisu hamutuk promove kooperasaun dezenvolvimentu ekonómika iha fronteira entre Timor-Leste ho Indonézia espesiál NTT ho Oé-Cusse, ida-ne’e vontade bo’ot ba komunidade hodi dezenvolve illa Timor,” nia katak.

Autoridade ne’e afirma, durante iha sorumutu ne’e, Primeiru Ministru tau konfiansa ba Autoridade RAEOA atu hola papél xave iha grupu de traballu ne’ebé sei diskute dezenvolvimentu korredór ekonómiku husi Timor-Leste hahú hosi Mota-ain, liuhosi Indonézia to’o Oé-Cusse Ambeno, hanesan parte importante hosi hakat ida ne’ebé sei iha furutu ho rezultadu ba otas ne’e no tuir mai.

Entretantu, diskusaun ne’e partisipa hosi reprezentante Prezidente Repúblika Joko Widodo, hosi Governadór Definitif Lembaga Ketahanan Nasionál Repúblika Indonésia (Lemhannas RI), Andi Widjanto, akompaña hosi Governadór Nusa Tenggara Timur (NTT), Viktor Bungtilu Laiskodat, no representante setór privadu Indonésia, Tommy Winata.

Jornalista: Abílio Elo Nini

Editór       :  Florencio Miranda Ximenes