DILI, 14 agostu 2023 (TATOLI)-–Ministériu Finansa (MF) liuhosi Gabinete Polítika no Jestaun Fundu Petrolíferu, fó sai katak Fundu Petrolíferu kontinua hatudu dezempeñu pozitivu iha trimestre daruak 2023.
“Fundu hetan rendimentu investimentu hamutuk millaun $242,3 hafoin hasai tiha despeza, totál retornu ba trimestre datoluk hamutuk 1,39% antes hasai despeza,” Koordenadór Gabinete Polítika no Jestaun Fundu Petrolíferu, Filipe Neto Bernardo, relata iha salaun MF, Aitarak-laran, segunda ne’e.
Enkuantu, fundu ninia balansu aumenta millaun $385 hosi biliaun $17,69 iha trimestre anteriór, ne’ebé númeru ne’e hafoin ajusta ho revaluasaun valór empréstimu, ba biliaun $18,08 iha trimestre daruak.
Nune’e, totál reseita petrolífera iha trimestre daruak hamutuk millaun $332,2 no totál osan hamutuk millaun $190 maka Governu foti hodi finansia orsamentu Estadu iha trimestre daruak ninia laran. Governu halo levantamentu hamutuk millaun $490, hosi fulan-janeiru to’o juñu.
Notísia relevante : Fundu Petrolíferu biliaun $18,075 iha trimestre daruak 2023
Fundu ninia investimentu iha merkadu finanseiru fahe ba iha karteira likidez no karteira kresimentu. Karteira likidez investe iha ativu ho risku kiik, nomeadamente iha kaixa no títulu kurtu prazu, ne’ebé Governu Estadu Unidu Ámerika (EUA) no ninia objetivu prinsipál hodi finansia levantamentu ba tinan-tolu tuir mai.
“Karteira likidez hetan retornu 0,73% iha trimestre daruak tanba taxa juru a’as. Balansu karteira likidez iha finál juñu hamutuk biliaun $3,37,” Koordenadór esplika.
Aleinde ne’e, karteira kresimentu kompostu hosi juru fixu no asaun inklui ninia objetivu prinsipál maka atu hetan retornu boot iha tempu-naruk. Karteria kresimentu fó retornu 1,62% iha trimestre daruak ho balansu biliaun $14,15.
Juru fixu fo retornu negativu 1,25% iha trimestre daruak kompara ho retornu pozitivu 2,61% ne’ebé hetan iha trimestre anteriór. Rentabilidade títulu sa’e iha trimestre daduak, ida-ne’e signifika presu títulu tu’un. Iha parte seluk, asaun fó retornu pozitivu 6,79% iha trimestre daruak no dadus aumenta tan ba gañu ne’ebé hetan iha trimestre dahuluk.
Gañu sira ne’ebé hetan iha tinan ne’e tulun taka fali lakon sira ne’ebé akontese iha tinan 2022. Totál retornu Fundu Petrolíferu ba tinan 2023 hamutuk 5,0%, ne’ebé karteria likidez fó retornu 1,9% no karteira kresimentu 6,0%. Hosi fulan-janeiru to’o juñu alokasaun investimentu ba iha asaun fó retornu 14,87%.
Fundu ninia retornu anuál desde inísiu hamutuk 4,13%. Asaun fó ona retornu 9,76% kada tinan hahú hosi tinan 2010, enkuantu retornu anuál juru fixu hamutuk 2% desde 2005. Asaun espera atu fó retornu ne’ebé a’as iha tempu naruk maibé mós risku boot iha tempu badak.
Ein termu dezenvolvimentu sira seluk ne’ebé akontese durante trimestre daruak hatudu finanseira Fundu Petrolíferu ramata no submete ona ba Parlamentu iha juñu 2023 no relatóriu anuál 2022 sei publika iha tempu badak nia laran.
“Avaliasaun independente ba fundu ninia investimentu iha Timor GAP, E.P. hatudu katak iha tinan 2022 nia rohan investimentu refere ninia valór hamutuk millaun $561. Diminuisaun iha valór 20% ne’e tanba aumentu iha rentabilidade títulu Governu no risku prémiu. Ho nune’e fundu ninia valór atualizadu iha tinan 2022 ninia rohan maka biliaun $17,27,” Koordenadór Gabinete Polítika no Jestaun Fundu Petrolíferu informa.
Nune’e mos, alokasaun investimentu ba US Treasury Inflation-Protected Securities (US TIPS) implementa iha fulan-abríl 2023. TIPS for protesaun balun ba karteira kresimentu hasoru risku inflasaun ne’ebé kontinua a’as liu espetativa.
Jornalista : Antónia Gusmão
Editora : Julia Chatarina
