OÉ-CUSSE, 14 agostu 2023 (TATOLI) – Hahú hosi fulan-janeiru to’o agostu 2023, Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), rekolla reseita hamutuk $14,640.00 ba kofre Estadu liuhosi servisu tránzitu nian.
Komandante PNTL RAEOA, Superintendente Nicolau Francelino da Costa, informa, reseita hirak-ne’e rekolla liuhosi pasa-revista ka operasaun ba motorizada no karreta tanba viola kódigu estrada.
“Kazu ne’ebé rejista aas iha parte tránzitu mak kazu asidente tráfegu, ita haree fali nia koima tún maibé asidente tráfegu mak sa’e maka’as fali, ne’ebé hahú hosi janeiru to’o agostu ne’e, totál koima ne’ebé PNTL Oé-Cusse rekolla ba kofre Estadu hamutuk $14,640.00,” Nicolau Francelino da Costa ba jornalista sira iha Oé-Cusse, segunda ne’e.
Koima hirak-ne’e rekolla bazea ba tipu infrasaun ne’ebé maka rekolla liuhosi sidadaun sira-ne’ebé kontra regra tránzitu, no infrasaun sira-ne’e la’ós komete hosi sidadaun bainbain maibé envolve mós membru Governu balu tanba kontra regra tránzitu nian.
“Ita bele halo auto apreensaun ba sira, hodi kumpre regulamentu tarefa tránzitu nian, maibé aplika sansaun ne’e la hanesan, tanba iha tipu infrasaun, balu lori karreta la ho dokumentu, lori motorizada la ho kapasete no dokumentu la kompletu,” nia afirma.
Kona-bá dadús asidente tráfegu, nia parte la esplika detalla kona-bá dadus mate tanba foin asume kargu komandante seidauk to’o fulan hodi halibur dadus sira, maibé nia promete iha tempu badak sei fó-sai ba publiku.
“Maibé nu’udar komandante PNTL iha RAEOA, hakarak hato’o mensajen ba sidadaun hotu iha territóriu Oé-Cusse, koopera hodi hakribi kontra sinál tranzitu, ba sira-ne’ebé utiliza transporte tantu privada no publiku, presiza kumpre regra tránzitu, nune’e bele evita asidente,” nia apela.
Notísia relevante: PNTL RAEOA halo inspesaun dokumentu membru sira molok pasa-revista iha públiku
Jornalista : Abílio Elo Nini
Editór : Evaristo Soares Martins
