OÉ-CUSSE, 14 agostu 2023 (TATOLI – Hahú hosi fulan janeiru to’o agostu 2023, Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), rejista kazu violénsia doméstika maka ass liu kompara ho kazu asidente tráfegu.
Komandante PNTL RAEOA, Superintendente Nicolau Francelino da Costa, informa, kazu sira-ne’ebé durante akontese iha Oé-Cusse ne’e, iha kazu tolu kontra bandu, violénsia doméstika no asidente tráfegu ho totál kazu 261.
“Maibé kazu iha rejista aas liu iha Oé-Cusse maka violénsia doméstika, tuir mai kontra-bandu, maibé ne’e akontese tuir nia tempu de’it númeru mós uitoan, no kazu seluk maka tráfegu umanu, maibé violénsia doméstika ne’e nia númeru sa’e maka’as,” Nicolau Francelino da Costa ba jornalista sira iha Oé-Cusse, segunda ne’e.
Kazu sira-seluk, hanesan konfrontasaun no kazu omisídiu, só akontese iha tinan hirak ba kotuk, iha 2023 parte PNTL seidauk rejista, maibé kazu kontra-bandu sasán tama ilegál sei kontinua.
“Foin daudaun ne’e parte PNTL hamutuk ho F-FDTL kaptura mina tama ilegál, kazu ida-ne’e, ami entrega ona ba Ministériu Públiku, atu kontinua prosesa ne’e ba oin,” nia afirma.
Maibé nu’udar komandante iha Rejiaun Oé-Cusse, desde 2020 asumi kargu nu’udar segundu komandante to’o daudaun 2023, asumi komandante PNTL, nia observa komesa iha mudansa ba karaterístika.
“Sidadaun iha Oé-Cusse, sira-nia moris no atetude komesa iha mudansa, maibé importante liu, tenke respeita lei regulamentu sira, respeita mós regra sira-ne’ebé válida iha nasaun Timor-Leste, maibé ita hateten loloos, iha Oé-Cusse ne’e besikliu fronteira ne’e, sira-nia karáter komesa iha mudansa, maibé seidauk iha mudánsa signifikativu, sei iha faze edukativu,” nia katak.
Nune’e hosi parte PNTL kontinua nafatin apela, nafatin koopera kontribui no hametin pás-estabilidade iha Oé-Cusse, nune’e bele hakat ba prosesu dezenvolvimentu ema hotu-hotu hein, liuliu Oé-Cusse oan.
“Joven sira kontinua promove dame, iha parte balun ita presiza hadi’a atu eduka nafatin, maibé ba PNTL, liuhosi ami servisu polísia komunitária, kontinua nafatin habelar informasaun, iha nivél baze para hotu-hotu muda mentalidade, muda hanoin no muda karaterístiku, nune’e ita moris iha ambiente foun hodi hateke ba futuru Oé-Cusse nia di’ak,” nia fó hanoin.
Notísia relevante: PNTL Oé-Cusse rekolla reseita rihun $14-resin
Jornalista: Abílio Elo Nini
Editor: Evaristo Soares Martins
