Covalima aloka $7,878,75 komemora loron FALINTIL-Konsulta Populár

COVALIMA, 15 agostu 2023 (TATOLI)–Prezidente Komisaun Organizadora, Francisco de Jesus Alves, hateten Autoridade Munisípiu Covalima aloka orsamentu $7,878,75 hodi realiza atividade iha ámbitu komemorasaun loron FALINTIL no konsulta populár iha Covalima.

“Ohin, hala’o enkontru ikus ba komisaun organizadora ne’ebé ita aloka orsamentu atu komemora loron Falintil iha 20 agostu no loron konsulta populár iha 30 agostu iha munisípiu Covalima,” Francisco de Jesus Alves hateten ba Agência Tatoli, iha resintu AMC, Sukaer Laran, tersa ne’e.

Komemorasaun loron nasionál ne’e, sei prienxe ho atividade kompetisaun Corrida Cavalo hanesan desportu ne’ebé identiku ona ho munisípiu Covalima, nune’e kada tinan sempre hala’o atividade Corrida Cavalho.

Orsamentu ba komemorasaun loron FALENTIL ho konsulta popular hamutuk $7,878,75 no hosi orsamentu ne’e, aloka orsamentu boot ba atividade kompetisaun Corrida Cavalo ne’ebe ho osan kuaze 4000-resin ne’ebé fahe ba preparasaun fatin aloka $900 no orsamentu fó prémiu ba vensedór hosi klase B, C, D no E hamutuk $3,525.

Razaun aloka orsamentu boot ba kompetisaun Corrida Cavalo tanba komunidade kesi kuda, fó han ba kuda ne’e komunidade sosa de’it, ho nune’e autoridade deside fó prémiu boot uitoan ba kompetisaun kalera kuda no bele fó motivasaun ba komunidade mós nafatin iha vontade atu haki’ak kuda.

Aleinde ne’e mós sei hala’o atividade sira hanesan kompetisaun sertame, corrida cavalo, kalan kulturál ne’ebé sei hahú iha loron 18 to’o 30 fulan-aggostu no kompetisaun kulináriu produtu lokál no seluk tan.

Antes ne’e, komisaun organizadóra deside ona fatin atu hala’o atividade iha ámbitu komemorasaun loron FALINTILno loron kunsulta popular ne’e, sei hala’o iha kampu suku Suai Loro, postu administrativu Suai, mnisípiu Covalima.

Jornalista : Celestina Teles

Editór       : Cancio Ximenes