DILI, 15 agostu 2023 (TATOLI)—Ministru Obra Públika, Samuel Marçal, hateten, IX Governu planeia ona ho Orsamentu Jerál Estadu (OJE) 2024 rezolve infraestrutura públika sira ne’ebé hetan estraga hosi kalamidade desde tinan 2021 to’o 2023.
“Iha orsamentu retifikativu ne’e labele rezolve problema hotu tanba halo de’it ajustamentu ba orsamentu para finaliza obra sira ne’ebé la’o ona, ba planu sira seidauk bele aumenta osan barak no realiza projetu foun,” Ministru Samuel informa ba Agência Tatoli, iha ninia knaar fatin, Caicoli, tersa ne’e.
Notísia relevante : Governu halo esforsu rekupera estragu infraestrutura públiku impaktu hosi kalamidade
Maski nune’e, governante ne’e subliña, rekuperasaun estragu infraestrutura públika sai mós prioridade ida ba Governu atuál atu haree kona-ba fatin sira ne’ebé maka akontese dezastre naturál iha tinan hirak liubá no foin daudaun. Maibé agora Governu sei foku hela ba planu anuál no orgánika ministériu.
“Buat barak mak ita sei foku hela, tanba foin finaliza orsamentu retifikativu no hein diskusaun iha Parlamentu Nasionál. Maibé buat sira ne’e hotu tama iha planu Governu nian, ne’ebé tenke hadi’a tanba se la hadi’a lalais sei afeta kuandu udan-boot. Planeia ona atu bolu empreza sira ne’ebé mak daudaun ezekuta hela obra sira hanesan iha projetu Mota laran Comoro nian, bolu sira para aselera no buat sira seluk,” nia argumenta.
Tuir Ministru Samuel, obra kualidade ida tenke haree ba rekursu.
“Ha’u foin daudaun haruka ona asesór internasionál ida no nasionál ida destaka iha laboratóriu nasionál atu identifika ekipamentu sira iha ne’ebá balun ne’ebé maka presiza halo kalibrasaun ligadu ho kualidade. Tanba tinan ne’e sai hanesan prioridade ida reforsa iha laboratóriu atubele garante kualidade obra Governu nian,” nia salienta.
Jornalista : Antónia Gusmão
Editora : Julia Chatarina
