DILI, 15 agostu 2023 (TATOLI)—Ministru Obra Públika, Samuel Marçal, hateten, konstrusaun ponte Bekusi foun la inklui iha programa no prioridade IX Governu nian.
“Governu hanoin populasaun presiza ponte urjente ne’ebé halo tiha ponte, agora halo tiha ponte depois sobu fali. Ha’u la hatene sira-nia hakarak saida, ponte antes ne’e di’ak maibé problema inundasaun la’ós problema ponte ne’e mak sala, ne’e problema hosi ambientál ne’ebé atu dehan ladún kontrola ba ita-nia sosiedade sira ne’ebé kee rai iha foho leten hodi halo ai sira monu hodi sai hanesan obstákulu afeta ba inundasaun hodi sai problema, la’ós ponte mak sai problema. Uluk ita gasta osan lubuk ida halo tiha ponte, sobu tiha ponte depois hakarak halo fali ponte,” Ministru Samuel hateten ba Agência Tatoli, iha ninia knaar fatin, Caicoli, tersa ne’e.
Notísia relevante : ADN halo hela verifikasaun ba dezeñu ponte foun Bekusi
Governante ne’e dehan, tuir loloos la presiza sobu.
“Husik hela ba, tanba sira la gosta ponte antes ne’e no hakarak tau fali ida agora kalen a’at ne’e, ida-ne’e mak di’ak liu entaun halo ba,” nia akresenta.
Ministru haktuir, antes ne’e Ajénsia Dezenvolvimentu Nasionál, institutu publiku (ADN, I.P) rasik mak halo verifikasaun ba dezeñu ponte Bekusi, enkuantu dezeñu ponte Bekusi foun iha ona maski seidauk iha serteza atu kontinua.
Antes ne’e, ponte Bekusi hetan estragu kauza udan-boot no inundasaun ne’ebé akontese iha loron 04 abríl 2021.
Iha loron 06 abríl 2021, Primeiru-Ministru, Taur Matan Ruak, halo vizita hodi haree kondisaun ponte Bekusi no iha momentu ne’eba kedan fó orientasaun ba Vise Primeiru-Ministru no Ministru Planu Ordenamentu, José Reis no Ministru Obra Públika sesante, Salvador Eugênio Soares dos Reis Pires, hodi sobu ponte tuan hodi harii ponte foun, nune’e labele fó impaktu negativu ba populasaun ne’ebé hela besik mota bainhira akontese inundasaun.
Governu prevee orsamentu ba estudu no dezeñu ponte Bekusi hamutuk $100.000 no ba kontrusaun ponte foun $500.000.
Daudaun ponte temporária Bekusi funsiona hela ho naruk maizumenus metru 20, ne’ebé uza materiál hosi ponte masin ho nia todan tonelada 50. MOP disponibiliza $90.000 ba konstrusaun ponte temporária ne’e.
Ponte Bekusi tuan harii iha loron 15 novembru 2016 no ramata iha loron 31 jullu 2018 ho kustu hamutuk $674.456,62.
Jornalista : Antónia Gusmão
Editora : Julia Chatarina
