DILI, 15 agostu 2023 (TATOLI) – Ministru Justisa (MJ), Amandio de Sá Benevides, fiar Lucia Lobato hanesan Koordenadora ba Grupu Traballu ba reforma justisa no halo revizaun ba Planu Estratéjiku Dezenvolvimentu (PED) 2011-2023.
“Lucia Lobato nia di’ak, nia ema ne’ebé iha kapasidade hodi bele ajuda Governu atu halo reforma iha setór justisa no bele halo servisu ba revizaun ba Planu Estratéjiku dezenvolvimentu 2011-2030 iha setór justisa”, Amandio de Sá Benevides ba jornalista sira iha kna’ar fatin Colmera, tersa, ohin.
Goververnante ne’e hateten, tempu badak ekipa traballu ne’ebé lidera hosi Lucia Lobato sei halo nia servisu.
“Primeiru-Ministru mak iha kompeténsia hodi nomea sé tán mak atu hola parte iha ekipa traballu ne’e, bainhira ema sira ne’e kompletu hotu ona, grupu traballu ne’e bele halo ona servisu”, nia dehan.
Benevides hateten, reforma setór justisa maske iha ona lei barak mak antes ne’e prodús maibé dala ruma lei sira ne’ e ladún responde ba realidade ne’ebé ita presiza.
“Tanba ne’e mak liuhosi reforma ida ne’e, ita presiza haree para depois bele revoga ou revé fali ka halo ajustamentu atu responde realidade ohin loron, bele mós integra iha programa IX Governu Konstitusionál iha área setór justisa”, nia adianta.
Nia esplika, iha lei balun, hanesan lei majistradu Judisiál, lei Ministériu Públiku no lei Defensoria Públika inklui lei seluk hanesan ba Komisaun Anti-Korrupsaun (CAC, sigla portugés), Polísia Sientífika Invetigasaun Kriminál (PCIC, sigla portugés) presiza halo revizaun.
“Nune’e ita bele halo harmonizasaun lei sira atu ema ne’ebé problema iha justisa bele hetan nia direitu tuir lei no Estadu direitu bele lao tuir dalan ne’ebé lei haruka”, nia subliña.
Hatán kona-ba revizaun Planu Estratejiku Dezenvolvimentu 2011-2030, Governante ne’e dehan, ida ne’e mós presiza atu bele haree atinjimentu saida mak setór justisa atinje bazea ba planu estratéjiku ida ne’e no ida ne’ebé mak seidauk atinjé, buka hadia nune’e mellora nafatin iha setór justisa iha Timor-Leste.
Despaixu Primeiru-Ministru IX Governu Konstitusionál Xanana Gusmão, númeru 03/PM/VIII/2023, nomea Antigu Ministra Justisa Lucia Lobato hodi lidera ekipa traballu ida atu reforma ba setór justisa iha Timor-Leste inklui halo revizun ba Planu Estrátejiku Dezenvolvimentu 2011-2030 setór justisa nian.
Jornalista: Natalino Costa
Editór : Zezito Silva
