DILI, 05 Janeiru 2026 (TATOLI)—Governu liuhusi Ministériu Asuntu Kombatente Libertasaun Nasionál (MAKLN) atribui ona fixa pagamentu ba veteranu segundu rejistu hamutuk 5.991 no sei falta 9.000-resin.
Ministru Asuntu Kombatente Libertasaun Nasionál, Gil da Costa Monteiro “Oan-Soru”, dehan hosi kombatente 9.000, MAKLN esforsu sei atribui fixa pagamentu durante loron 15 nia laran.
“To’o ohin tuku rua ho balun, sira-ne’ebé mak atende no atribui ona fixa pagamentu ne’ebé bele asesu ba sira-nia osan iha banku ne’ebé de’it mak sira pertense hamutuk 5.991,” Gil ba jornalista sira iha nia kna’ar fatin, Komoro, Segunda ne’e.
Notísia relevante: MAKLN distribui ona fixa pagamentu 4.000-resin ba kombatente
Nia dehan husi munisípiu ne’ebé mak termina ona, ladún hatene maibé sira atribui rihun lima ba veteranu sira.
“Ha’u la dehan husi munisípiu ne’ebé-ne’ebé mak termina ona maibé ha’u fó totál 15.697. Signifika ba tiha ona 5.000-resin, no sei hela 9.000-resin,” Gil tenik.
Nia hatutan ohin haree menus la hanesan baibain, nune’e Ministériu Asuntu Kombatente Libertasaun Nasionál husu nafatin karik sira mai hanesan ne’e.
“Tanba iha 29 Dezembru 2025 ami atende 700 no mós iha 30 Dezembru hamutuk 700. Nune’e, ohin loron hahú menus tanba sira simu fixa pagamentu ba ona idak-idak nia munisípiu hodi simu osan. Tanba ami funsionáriu ne’e la fila bá uma, almosu iha-ne’e to’o lokraik mak fila,” nia esplika.
Oan-Soru dehan antes ne’e Ministériu Asuntu Kombatente Libertasaun Nasionál fó-sai ona oráriu maibé tanba veteranu sira mai kahur de’it entaun halo atendimentu jerál.
Maski antes ne’e Ministériu Asuntu Kombatente Libertasaun Nasionál fó tiha ona oráriu atubele veteranu sira la’o tuir, maibé solusaun di’ak mak koopera no koordena.
Jornalista: Osória Marques
Editór: Xisto Freitas da Piedade
