DILI, 24 Dezembru 2025 (TATOLI)–Dezde iha 15 Dezembru to’o ohin loron, Ministériu Asuntu Kombatente Libertasaun Nasionál (MAKLN), distribui ona fixa pagamentu 4.000-resin ba kombatente sira hosi totál 15.697.
“Durante loron-ualu halo atendimentu, tékniku Diresaun Nasionál bá Pensaun no Subvensaun (DNPS) konsege distribui Fixa Pagamentu ba benefisiáriu sira hamutuk rihun-haat-resin,” Ministru Asuntu Kombatente Libertasaun Nasionál, Gil da Costa Monteiro ‘Oan-Soru’, dehan liuhusi nota komunikadu ne’ebé TATOLI asesu, Kuarta ne’e.
Notísia relevante: Kombatente sira kalan rua toba iha resintu MAKLN hodi hein Fixa Pagamentu
Ministru ne’e esplika hosi benefisiáriu 4.000-resin ne’e maihosi munisípiu hotu-hotu.
Nune’e, Oan Soru apela ba benefisiáriu katak sei kontinua halo atendimentu fali iha semana oin, Segunda-Tersa (29-30 Dezembru 2025).
“Tanba ne’e, MAKLN hakarak apela nafatin ba benefisiáriu sira-ne’ebé atu mai foti fixa pagamentu nian iha DNPS, keta haluha, lori nafatin ho dokumentu importante sira (kartaun eleitóral, billete identidade, sertidaun kazamentu no sertidaun baptízmu), nune’e tékniku sira bele komprova no halo re-atualizasaun iha sistema baze dadus,” nia apela.
Durante loron-ualu, distribuisaun fixa pagamentu nian ba benefisiáriu sira, tékniku sira hetan seguransa másima hosi Komandu Polísia Nasionál Timor-Leste (PNTL).
Jornalista: Osória Marques
Editór: Xisto Freitas da Piedade
