DILI, 15 agostu 2023 (TATOLI) – Polísia Nasionál Timor-Leste (PNTL) liuhosi ekipa konjunta hosi Servisu Informasaun Polísia (SIP), Servisu Nasionál Intelejénsia (SIN), Unidade Falintil no Departementu Investigasaun Kriminál (DIK) hamutuk ho PNTL Eskudra Dom Aleixo, detein suspeitu na’in-hitu ne’ebé prodús Bomba Molotov hodi prepara atu halo asaun hasoru membru PSHT ne’ebé halo atividade graduasaun iha Tibar.
Bainhira ekipa konjunta simu informasaun hosi fonte balun iha área Masilidun Tasi-Tolu, Suku Comoro, Postu Administrativu Dom Aleixo katak joven balun iha área refere halibur hela sasan atu prodús Bomba Molotov hodi ataka membru PSHT ne’ebé halo hela atividade graduasaun iha Tibar.
Maibé planu sira ne’e la konsege tanba parte autoridade seguransa liuhosi ekipa konjunta halo kedan intervensaun rápida hodi lokaliza joven hirak ne’e nia atividade iha segunda (14/8) iha oras 20:00, ekipa konjunta halo kedan detensaun ba joven sira ne’e ho fráglante delitu.
“Ita-nia ekipa konjunta halo detensaun fráglate delitu ba suspeitu na’in-hitu ne’ebé prodús Bomba Molotov”, Xefe DIK, Superintendente Polísia João Belo dos Reis ba jornalista sira iha Kuatel Jerál PNTL, Caicoli, tersa ne’e.
Nia esplika, baihira ekipa konjunta tún ba terenu hodi deteta duni katak joven sira ne’e hahú prodús bomba molotov ho evidénsia sira ne’ebé joven sira ne’e prepara mak hanesan butir ki’ik hamutuk 25, pregu 10 séntimu, gazolina masa ida, katana ida no sumbu fungaun ne’ebé sira prepara ona atu hatama butir sira ne’e.
Nune’e, ekipa rekolla kedan evidénsia sira ne’e iha terenu hodi lori sai hanesan faktus ba investigasaun.
João Belo hateten, suspeitu sira ne’ebé mak PNTL detein ho naran inisiál AC, FS, GMA, PALAS, EAS, RFM no MCAT.
“Suspeitu sira ne’e ita lori kedan mai Departamentu Investigasaun Kriminál Nasionak hodi prosesa no identifika. Iha Prosesu identifikasaun ne’e ita konsege detein suspeitu na’in-lima, enkuantu na’in-rua seluk horikan kedan ita husik fila fali tanba ho ida menor”, nia informa.
Nia hateten, suspeitu na’in-lima ne’e agora daudaun detein ona iha sela Komandu PNTL Munisípiu Díli no suspeitu ho minoriodade seluk nia prosesu sei kontinua.
“Suspeitu nain rua ne’e, ami sei bolu nia inan ho aman para bele fó atensaun ba nian oan sira, liuliu movimentu oan sira”, nia adianta
Xefe DIK ne’e dehan, iha loraik, DIK sei aprezenta faktu no evidénsia sira ne’e ba Ministériu Públiku hodi kontinua prosesa kazu ne’e ba oin.
PNTL sei buka tuir ema ne’ebé apoiu suspeitu na’in-hitu ne’ebé prodús Bom Molotov atu identifika.
“Maibé buat hotu sei iha hela prosesu investigasaun. PNTL mós sei buka tuir sé mak suporta ita nia suspeitu sira hodi halo ida ne’e, hosi ne’ebé no oinsá, ita sei buka ema sira ne’e”, nia konklui.
Jornalista: Natalino Costa
Editór : Zezito Silva
