Expedito husu PN aselera hili membru CI foun troka nia
DILI, 16 agostu 2023 (TATOLI)—Prezidente Parlamentu Nasionál (PPN), Maria Fernanda Lay, kuarta ne’e, simu audénsia ho Sekretáriu Estadu Komunikasaun Sosiál (SEKOMS), Expedito Dias Ximenes, hodi ko’alia kona-ba substituisaun ba iha membru Conselho de Imprensa (CI).
Notísia Relevante: Deputada Cedelizia husu PN hili membru CI foun troka Expedito
“Ohin, ha’u mai hasoru Prezidente Parlamentu Nasionál, primeiru atu husu aselera substituisaun ha’u-nian hanesan membru Conselho de Imprensa, atu bele substitui fali kandidatu seluk atu bele kompleta iha Conselho de Imprensa nia membru,” Expedito Dias Ximenes hateten ba jornalista sira hafoin ramata enkontru iha PN.
Tambá, nia dehan, CI iha membru na’in-lima, na’in-rua hosi asosiasaun jornalista ne’ebé hili liuhosi eleisaun, ida hosi órgaun komunikasaun sosiál ka mídia na’in no rua hosi PN kompostu hosi ida área mídia no ida ba área legál nian.
“Na’in rua hosi Parlamentu ne’e, ida hosi expert mídia ne’ebé hau rasik momentu ne’e Parlamentu hili, reprezenta Parlamentu iha Conselho Imprensa. Tanba, ha’u hetan kna’ar seluk ona, entaun presiza iha nia substituisaun temporáriu restu mandate. Purtantu, mandatu Conselho Imprensa ida-ne’e to’o iha 2025,” nia hateten.
Nia hateten, presiza substituisaun tanba tuir lei komunikasaun sosiál no estatutu CI katak bainhira atu hola desizaun balun iha plenária iha situasaun balun presiza tenke membru na’in-lima kompletu.
Tan ne’e, presiza duni substituisaun ho lalais hodi nune’e sira bele hola desizaun oinsá atu bele planu orsamentu 2024 tuir mai, no desizaun seluk plenária atu halo kontratu ba funsionáriu sira, kontratu atu halo regulamentu ba iha CI nian no desizaun atu hili Diretór ezekutivu.
“Tanba, deliberasaun sira-ne’ebé temi ne’e presiza tenke membru ema na’in-lima kompletu,” nia dehan.
Governante ne’e hateten, durante enkontru resposta hosi Prezidente PN katak daudaun ne’e iha prosesu nia laran hela bankada sira hetan ona informasaun hosi Prezidente PN ho Xefe Bankada sira prepara daudaun kandidatu hafoin diskusaun ramata Orsamentu Retifikativu 2023, PN sei nomea ona kandidatu foun ba iha CI.
Expedito mós sujere tanba iha mandatu rua ne’ebé mai durante ne’e jornalista sira mane hotu de’it, nune’e se bele PN hili kandidatu ida tuir mai agora substitui nia-parte, se bele jornalista feto ne’ebé iha esperiénsia natoon iha área komunikasaun sosiál, maibé ne’e kompeténsia PN nian
Expedito Dias Ximenes hetan fiar sai Sekretáriu Estadu Komunikasaun Sosiál (SEKOMS) iha IX Governu konstituisionál ne’ebé simu pose iha 01 jullu no iha 03 jullu hatama kedas karta rezignasaun hosi membru CI.
Notísia Relevante: Expedito Dias Ximenes-Benevides Correia reprezenta PN ba CI
Jornalista : Nelson de Sousa
Editór : Cancio Ximenes
