DILI, 16 agostu 2023 (TATOLI) – Projetu Konstrusaun no Reabilitasaun Infraestrutura Edukativa (PKRIE) 29 iha munisípiu 10 konklui ona. Nune’e, Diresaun Nasionál Dezenvolvimentu Parke Eskolár sei submete pedidu ba Ministra Edukasaun, Dulce de Jesus, no Sekretáriu Estadu Edukasaun, Ensinu Sekundáriu ba Eskola Téknika, Domingos Lemos, atu deside data ba serimónia inaugurasaun nian.
Eskola sira ne’e lokaliza iha Aileu, Ainaro, Baucau, Bobonaro, Ermera, Lautém, Liquiçá, Manatuto, Manufahi no Viqueque.
Projetu 29 ne’ebé tinje ona 100% ne’e Diresaun Nasionál Dezenvolvimentu Parque Eskolár asesu husi relatóriu serbisu ne’ebé hato’o husi enjeñeiru sira ne’ebé maka destakadu iha munisípiu 10.
Diretór Nasionál Dezenvolvimentu Parke Eskolár, Agostinho Soares, relata katak Ministériu Edukasaun iha totál projetu hamutuk 228 ne’ebé 202 nia verba mai transferénsia públika, 12 husi kapitál dezenvolvimentu no seluk husi bens servisu.
“Husi transferénsia públika ne’e ita aposta hotu ba iha Projetu Konstrusaun no Reabilitasaun Infraestrutura Edukativa 202. Husi totál númeru refere sei falta de’it ona projetu 59 mak seidauk hetan inaugurasaun”, responsavel ne’e afirma iha Vila Verde, ohin.
PKRIE ne’ebé hahú dezde 2021, iha 170-resin mak hetan ona inaugurasaun no hela de’it balun mak sei iha hela prosesu.
“Kuandu projetu 29 ne’e hetan tan inaugurasaun, bele dehan tama ona inaugurasaun faze datoluk no falta de’it projetu 30 maka sei iha prosesu nia laran. Tuir relatóriu ne’ebé tama hatudu katak iha fulan setembru ne’e bele konklui ona 100%”, realsa.
Governu anteriór aloka millaun $20 ba konstrusaun no reabilitasaun ba estabelesimentu edukativu 202 ho sala-de-aula hamutuk 657.
Notísia relevante: Edukasaun avalia implementasaun PKRIE iha territóriu
Jornalista: Tomé Amado
Editora: Maria Auxiliadora
