DILI, 16 agostu 2023 (TATOLI)—Ministériu Turizmu Ambiente (MTA) liuhosi Diresaun Nasionál Alterasaun Klimátika (DNAK) no Autoridade Nasionál Dezignada identifika ona fatin 90 resin hodi implementa programa Asesmentu Integradu ba Vulnerabilidade (AIV).
Diretór Jerál Meiu Ambiente MTA, João Carlos Soares, informa, antes ne’e ekipa identifika fatin vulnerabilidade iha suku sira ne’ebé sai pontu importante ba risku dezastre naturál relasiona ho efeitu alterasaun klimátika ba mundu.
“Ita identifika ona fatin 90 resin hodi implementa programa Asesmentu Integradu ba Vulnerabilidade atu haree ba risku mudansa klimátika kada suku nian no halo mitigasaun, adaptasaun saida mak ita bele halo,” Diretór hateten liuhosi programa entrevista eskluziva live streaming Agência Tatoli, iha estúdiu Farol, kuarta ne’e.
Notísia relevante : PN ratifika konvensaun alterasaun klimátika
Liuhosi programa AIV, ekipa halo interasaun ho komunidade hodi fó informasaun atu halo adaptasaun no mitigasaun tanba mosu mudansa klimátika maihosi akesimentu globál hodi afeta ba mudansa temperatura. Akesimentu ne’e rasik maihosi gás efeitu estufa ne’ebé rezulta hosi atividade indústria inklui sunu no estragu atmosfera no ikus mai hamosu degradasaun kamada ozonu.
“Ita hatene bainhira mosu ona mudansa klimátika ida-ne’e sei afeta ba buat barak inklui ba biodiversidade, nune’e ita halo esforsu hotu, nune’e komunidade bele iha esperiénsia oinsá kuidadu ambiente sira,” nia akresenta.
Parte ambiente halo atividade ho orsamentu hosi Governu inklui apoia fundu hosi parseiru sira.
“Fundu ne’ebé ita hetan maihosi parseiru sira mak hanesan hosi Fundu Klimátika Verde nian atu hasa’e rezilénsia hasoru dezastre hahú hosi 2018 to’o mai agora ita simu ona millaun $55, no Fundu Ambiente Globál ba tinan kotuk ita hetan millaun $16 no tinan ne’e ita hetan tan millaun $29,” Diretór relata.
Ho orsamentu sira ne’e, ekipa hosi Governu halo servisu hamutuk ho parseiru hodi implementa sistema alerta sedu, hasa’e rezilénsia hasoru dezastre naturál no seluk tan.
Jornalista : Arminda Fonseca
Editora : Julia Chatarina
