DILI, 16 agostu 2023 (TATOLI) – Profesór 1.715 ne’ebé asina ona kontratu iha mandatu Governu anteriór, liuhusi Ministériu Edukasaun, Juventude no Desportu (MEJD) sei simu retroativu entre agostu no setembru.
Pagamentu ba manorin kontratadu sira ne’e, tuir Diretór-Jerál Administrasaun no Jestaun Finansa husi Ministériu Edukasaun, Antoninho Pires, sei selu husi janeiru to’o agostu.
Tuir loloos pagamentu ba saláriu ne’e halo de’it iha agostu bazeia ba desizaun ne’ebé mak Komisaun Funsaun Públika hasai, maibé tanba falla iha sistema maka sei realiza to’o fulan oin.
“Pagamentu retroativu ne’e akumula númeru profesór ho osan montante ida boot, tanba konta husi janeiru to’o agostu, entaun presiza hatama iha sistema. Tanba sistema mós la’o lentu entaun pagamentu sei atraza. Labele halo dala ida iha agostu, maibé balun sei hetan sira-nian direitu iha setembru”, Antoninho Pires hatete ba Tatoli, iha Vila Verde.
Orsamentu retroativu ne’ebé Ministériu Edukasaun prevee atu seluk ba profesór sira ne’ebé tama iha tinan fiskál 2023 hamutuk millaun $65-resin. Orsamentu ne’e rasik sei uza hodi selu saláriu ba profesór sira inklui mós sei selu pagamentu retroativu ba profesór permanente sira ne’ebé maka goza ona sira-nia rejime karreira nian.
Relasiona ho profesór 500 ne’ebé maka tama iha lista reklamante ne’e nia prosesu sei hein implementasaun dekretu-lei foun.
Totál profesór voluntáriu ne’ebé hakat ona ba kontratadu ne’e mai husi Pré-Eskolár hamutuk 121, Ensinu Báziku 894, Sekundáriu Jerál 398, Tékniku Vokasionál 126 no Programa Eskola iha Uma 176.
Rekorde katak porta-vós profesór kontratadu sira, Agostinho da Costa Belo, hato’o, foin lalais ne’e, preokupasaun sira tanba asina ona kontratu ho MEJD dezde abríl, maibé seidauk simu saláriu.
Nune’e nia rekomenda ba Primeiru-Ministru, Kay Rala Xanana Gusmão, no Ministra Edukasaun atu prosesa lalais ona sira-nian direitu, tanba sira kontribui ona ba forma jerasaun foun sira iha edukasaun formál iha tempu barak nia laran.
“Ami-nian esperansa ba mandatu IX Governu ida ne’e mak kontinua rezolve manorin sira-nian kontribuisaun nu’udar rekursu ida ne’ebé iha kualidade atu garante dezenvolvimentu iha futuru”, nia espera.
Notísia relevante: KFP aprezenta karta ba Ministra Edukasaun atu deside kontratu profesór 1.715
Jornalista: Tomé Amado
Editora: Maria Auxiliadora
