DILI, 16 agostu 2023 (TATOLI)—Prezidente Parlamentu Nasionál (PPN), Maria Fernanda Lay, sei reprezenta Prezidente Repúblika (PR), José Ramos Horta, iha simeira Xefe Estadu Komunidade Nasaun Ko’alia Lian Portugés (CPLP, siglá portugés) ne’ebé sei realiza iha São Tome e Principe iha 27 agostu 2023.
Notísia Relevante: Simeira Xefe Estadu CPLP sei realiza iha São Tome e Principe iha 27 agostu
“Asuntu prinsipál ne’ebé lori ha’u, mai iha ne’e ohin, tanba ha’u sei ba reprezenta Prezidente Repúblika vizita Estadu ba São Tome e Principe, ne’ebé tuir loloos Xefe Estadu mak ba maibé iha ajenda seluk, tanba ne’e mak ha’u mai konsulta molok ha’u ba,” Prezidente PN, Maria Fernanda Lay, hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál, Bairru Pite, kuarta ne’e.
Prezidente PN nia reprezentasaun Estadu Timor-Leste iha São Tome no mós atividade ne’ebé halo tiha ona iha Asembleia Parlamentár ba ASEAN ninian, nune’e delegasaun sei dezloka iha 21-22 agostu ne’e.
PPN konsulta ho Xefe Estadu tanba iha simeira altu nível CPLP ne’e sei iha desizaun ne’ebé tenke iha CPLP sira husu ita Timor-Leste atu sai hanesan uma-na’in ba CPLP iha 2025-2027.
“Ne’ebé, ha’u husu autorizasaun Xefe Estadu, se aseita ka lae, maibé Xefe Estadu la aseita tanba ita mós sei tama ba ASEAN iha 2025. Ho razaun ida-ne’e, mak ha’u sei hato’o iha ne’eba katak labele aseita atividade internasionál rua dala ida de’it, Timor-Leste simu tan iha 2025, ne’ebé CPLP dala ruma ita sei hadi’a ba tinan rua seluk mai no ita sei simu uluk mak ASEAN ninian iha 2025,” nia dehan.
Durante enkontru, Prezidente PN hato’o kona-ba ninia parte iha semana kotuk partisipasa forum altu nível ASEA Inter-Parlamentár (AIPA) iha Jakarta-Indonézia, hodi hato’o saida mak TL halo konkordánsia iha ne’eba no mós nasaun sira-ne’ebé fó apoiu tomak ba Timor-Leste atu tama ba ASEAN, apoiu ba membru Parlamentu Nasionál no mós tékniku iha ministériu sira-ne’ebé sei hola parte iha ne’eba.
Jornalista : Nelson de Sousa
Editór : Cancio Ximenes
