Falur rona ona informasaun membru F-FDTL hakanek joven ida iha Liquiçá
DILI, 17 agostu 2023 (TATOLI)—Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Falur Rate Laek, hateten, nia parte simu ona informasaun ligadu ho membru ida deskonfia tiru kanek joven ida iha aldeia Leopa, suku Dato, postu administrativu Liquiçá Vila, munisípiu Liquiçá, iha kinta kalan.
“Ha’u simu ona informasaun ohin dadeer-ne’e, no ha’u transmite ona ba Ministru Defeza kona-ba akontesimentu ne’e. Investigasaun la’o hela, Polísia militár ba kaer hotu tiha ona membru sira ne’e no submete ba inkéritu,” Tenente Jenerál Falur Rate Laek, informa bainhira partisipa iha atividade PNTL, iha ámbitu vizita Primeiru-Ministru, Xanana Gusmão, iha Sentru Formasaun Akademia Polísia, Comoro, kinta ne’e.
Notísia relevante : Komandu PNTL simu ona kazu ema tiru joven ida iha Covalima
Tenente Jenerál Falur haktuir, akontesimentu ne’e mai hosi disturbu iha festa ida.
“Sira bá festa mak baku malu depois halo kilat tarutu tan, kaer hotu tiha ona, prosesu investigasaun la’o tiha ona, liuhosi investigasaun mak bele hatene loloos,” nia tenik.
Falur dehan, Komandu F-FDTL liuhosi Portavós Xefe Estadu Maiór Adjuntu, Kapitaun már-e-guerra, João Silva sei fó sai kronolojia kompletu ligadu ho akontesementu, maibé daudaun prosesu ne’e iha hela investigasaun.
Jornalista : Antónia Gusmão
Editora : Julia Chatarina
