MS partilla planu estratéjiku melloramentu saúde 2020-2024 iha Bobonaro
MALIANA, 17 agustu 2023 (TATOLI) – Ministériu Saúde liuhosi Gabinete Garantia Kualidade iha Saúde, kinta ne’e realiza worskshop Rejionál hodi partilla planu estratéjiku nasionál meloramentu kualidade kuidadu saúde Timor-Leste 2020-2024 ba diretór servisu saúde munsipál no xefe sentru saúde sira iha munisípiu Bobonaro, Ermera no Liquiçá.
Diretór Gabinete Gagantía Kualidade Saúde, Feliciano dos Santos Pinto, esplika, planu estratéjíku ne’e lansa iha Liquiça no Aileu iha tinan 2020 ho objetivu atu garante prestasaun saúde ne’ebé kualidade ba populasaun iha territóriu nasionál.
Maibé tanba kestuaun Pandemia Covid-19 interrompe atividade hotu-hotu nune’e to’o agora sei iha hela faze desiminasaun.
Nune’e Diretór Feliciano, dehan iha sorumutu ho diretór sira servisu munisipál no xefe sentru saúde sira hosi munisípiu Bobonaro, Ermera no Liquiçá, oinsá atu forma ekipa melloramentu kualidade iha munisípiu sira atubele asegura no kontrola superviziona kualidade prestasaun saúde iha idak-idak nia fasilidade saúde.
“Imi só garantia, apoia no fasilita de’it, entermu estratéjia asuntu polítika, jurídiku ne’ebé mak iha relasaun ho lei no dekretu lei sira, kompeténsia gabinete ida-ne’e hodi hato’o no habelar informasaun ba munisípiu hotu-hotu,” nia ko’alia salaun ekontru servisu munisipál saúde Bobonaro.
Nia subliña, planu estratéijku refere iha nia domíniu lubuk ida no pilár importante tolu ne’ebé maka foku liubá rekursu-umanu, prestasaun saúde no infraestrutura.
Nia dehan, kona-bá rekursu umanu iha polítika saúde nasionál nian deifine ona katak iha postu saúde ida, enfermieiru, parteira, fármasia hira, maibé na realidade seidauk atinje no balu kuantidade barak liu fali.
Nune’e liuhosi workshop refere atu orienta mós diretór servisu saúde munisipál no xefe sentru saúde sira atu prepara no hatene sukat idak-idak nia kulidade intermu fasilidade, rekursu umanu no infraestrutura ho fasilidade saúde sira seluk.
Sekretáriu autoridade munisípiu Bobonaro, João de Fátima do Carmo, konsidera atividade refere importante tebes, tanba ne’e governu lokál prontu koopera no kolabora hodi garante prestasaun saúde ne’ebé mak di’ak liután ba komunidade sira.
“Ami agradese ba IX Governu no esparansa boot katak ho Workshop sira hanesan ne’e bele lori rezultadu ne’ebé di’ak, lori mudansa ida-ne’ebé di’ak, tanba ita hatene kata kamí munisípiu Bobonaro iha tinan kotuk virál la halimar, ita komunidade ida nia transporta ho trek de’it hosi Lolotoe mai to’o Maliana,” nia katak.
Enkuantu atividade ne’e realiza durante loron rua, hahú kinta (17/08) to’o sesta (18/08) ne’ebé hetan partisipasaun hosi diretór servisu munisipál Bobonaro, Liquiçá no Ermera no xefe sentru saúde sira.
Notísia relevante: Austrália kontinua apoia MS reforsa sistema saúde primaria iha Dili
Jornalista : Sérgio da Cruz
Editór : Evaristo Soares Martins
