iklan

NASIONÁL, POLÍTIKA

SEI prioriza haree rejime jurídiku traballu doméstiku iha loron 120

SEI prioriza haree rejime jurídiku traballu doméstiku iha loron 120

Sekretária Estadu Igualdade, Elvina Sousa Carvalho. Imajen TATOLI/António Daciparu

DILI, 17 agostu 2023 (TATOLI)—Sekretária Estadu ba Igualdade (SEI), Elvina Sousa Carvalho, hateten iha loron 120 nia-laran ne’e SEI iha kompromisu atu fó prioridade ba haree prosesu ba rejime jurídiku traballu doméstiku liuliu traballadór sira.

Notísia Relevante: Elvina: “Presiza halo revizaun ba lei violénsia doméstika”

“SEI mós halo prosesu ba rejime jurídiku ne’e liga ba ita-nia maluk feto ne’ebé halo traballu doméstiku ho ita-nia família sira. Tanba, ita hatene katak to’o agora ita seidauk haree kona-ba ida-ne’e,” Elvina Sousa Carvalho hateten ba Agencia Tatoli liuhosii programa “Entrevista Eskluziva” ho topiku “SEI nia Kompromisu no Programa Prioridade ba Loron 120”, iha estúdio TATOLI, Farol, kinta ne’e.

Tanba, nia hateten, ba traballu doméstiku sira mak dala barak hetan violénsia, maibé laiha lei ida hodi proteje sira, ezemplu iha esplorasaun, esploitasaun no dala ruma asediu seksuál no asaltu seksuál akontese ba sira.

“Ita presiza duni rejime jurídiku ida-ne’e, nune’e presiza konsultasaun ne’e la’o. Tanba, iha Parlamentu Nasionál, uluk ha’u-nia mandatu, ne’e komesa hanoin ida dehan tenke ona atu hakat ho lei traballu doméstika. Se la avansa ho lei traballu doméstiku mak prosesu tama tiha ona maibé infelizmente la to’o halo diskusaun,” nia dehan.

Nia hatutan, iha tan hanoin ida hosi sosiedade sívil sira katak lei rejime jurídiku importante ne’ebé haree duni ba traballu doméstiku ne’e, entaun hosi ne’e presiza haree artigu ida ho artigu seluk.

“Tanba, ita ko’alia kona-ba igualdade mak presiza iha protesaun dignidade no direitu ne’e mós inklui ona,” nia hateten.

Governante ne’e hateten, programa prioridade mak promove igualdade jéneru liuhosi programa lejislasaun sira, orsamentu sensível ba jéneru, ida-ne’e la’ós ba SEI de’it maibé ba interministeriál tanba ne’e mak SEI hola parte iha Konsellu Ministru, nune’e hodi garante no asegura prosesu ba desizaun sira liga polítika.

“Kuandu ita ko’alia kona-ba igualdade jéneru, SEI iha programa própriu mak programa empoderamentu feto iha ekonómia, empoderamentu feto iha vida polítika, halo diseminasaun ba planu nasionál violénsia bazeia ba jéneru,” nia hateten.

Tanba ne’e, Sekretária Estadu dehan atu alkansa komprimisiu polítika iha loron 120 sei implementa programa prioridade liuhosi atividade importante 14.

Entretantu, nia hateten, SEI presiza halo revizaun ba lei kontra violénsia doméstiku no daudaun ne’e iha prosesu konsultasaun ho parte relevante.

“Iha nesesáriu atu halo revizaun ba lei ne’e. Prosesu lei ne’e iha konsultasaun no komunikasaun nia-laran hodi hakat ba revizaun. Entaun, iha loron 120 ne’e ita halo komunikasaun ho entidade relevante ne’ebé durante ne’e la’o hela, no hosi ne’e SEI garante katak aselera prosesu ne’e atu halo revizaun, tanba nesesáriu duni ba lei violénsia kontra doméstiku,” nia dehan.

Notísia Relevante: SEI prioriza atividade importante 14 atu alkansa kompromisu loron 120

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!