iklan

DILI

Elvina: “Presiza halo revizaun ba lei violénsia doméstika”

Elvina: “Presiza halo revizaun ba lei violénsia doméstika”

Sekertaria Estadu Igualidade, Elvina de Sousa Carvalho. Imajen Tatoli/Francisco Sony

DILI, 17 jullu 2023 (TATOLI)–Sekretária Estadu Igualdade no Inkluzaun (SEII), Elvina de Sousa Carvalho, hateten presiza halo revizaun ba lei violénsia doméstika tanba ninia implementasaun kle’ur ona.

“Ita hotu hatene katak lei violénsia doméstika ne’e, presiza duni halo revizaun tanba ninia implementasaun kle’ur ona, nune’e presiza halo revizaun,” Elvina de Sousa Carvalho hateten ba Agência Tatoli hafoin partisipa aniversáriu FOKUPERS ba dala-26, iha salaun João Paulo II, Comoro, segunda ne’e.

Atu halo revizaun ba lei refere ne’e, presiza haree lai artigu hotu-hotu tanba dala ruma artigu ida bele debate kle’ur.

“Ita presiza halo diskusaun ho ema legál sira ho ema pratikante lei sira, no ba sira-ne’ebé durante ne’e servisu makaas iha área ne’e. Revizaun ne’e ita haree ba ida-ne’ebé mak nesesariu atu halo, la signifika total artigu hotu,” nia dehan.

Lei ne’e nia objetivu mak atu implementa medida ne’ebé efetivu atu prevene no promove direitu vítima sira-nian no apoiu vítima hosi violénsia doméstika, hala’o tuir estandár internasionál direitu umanu nian.

Lei ne’e atu kria no haforsa mekanizmu ba prevensaun violénsia doméstika no promove direitu vítima no mós fó protesaun legal ba vítima, tanba obrigasaun hosi Lei refe fó ba Estadu atu prevene violénsia doméstika inklui violénsia fíziku, seksuál, psikolojiku no ekonomia.

Estadu mós hetan obrigasaun atu proteje no fó asisténsia ba vítima sira, ho intensaun atu proteje membru família hosi violénsia doméstika inklui violénsia hosi espoza, eis espoza, oan sira, parente no ema seluk ne’ebé servisu iha uma laran (empregada).

“Kona-ba prevensaun, polísia hetan obrigasaun espesiál atu prevene no proteje vítima sira,” nia hateten.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!