SSSI Covalima fó prioridade ba programa 5

COVALIMA, 17 agostu 2023 (TATOLI)-Diretór Sentru Solidaridade Sosiál no Inkluzaun (SSSI) munisípiu Covalima, Agapito Asis, relata nia parte sei implementa programa prioridade 5 tuir kalendariu trimestrál durante 2023.

Tuir kalendariu trimestrál durante fulan tolu nian, nia esplika programa dahuluk, asisténsia umanitária, daruak, apoia ba ema ho diefisiénsia, datoluk maka violénsia bazeia ba jéneru, dahaat maka protesaun ba labarik no ikus liu programa bolsa da mãe jerasaun foun no mós bolsa da mãe kondisionál.

Maibé, nia hateten aleinde programa lima ne’e, iha mós programa sira seluk tan, maka ninia parte sei implementa durante tinan ida ne’e.

Nune’e iha tinan 2022 liubá Sentru Solidaridade Sosial hala’o levantamentu dadus kona-ba populasaun ne’ebé sei moris iha liña kiak nia laran.

“Levantamentu dadus hodi haree tipu komunidade ho problema  hanesan, labarik risku ho perigu, adosaun labarik, labarik ne’ebé ho podér paternál, labarik nakar, labarik konflitu ho lei, ema tane liman hodi husu ismola, ema ne’ebé moris lemo-lemo, konsumidór droga, vítima violénsia ba jéneru, ema ho difisiénsia ho moras króniku,”Agapito Asis,  informa  ba Agência TATOLI,  iha resintu Autoridade Munisípiu Covalima sukaer-laran, kinta -ne’e.

Nia dehan, hosi levantamentu dadus ne’e sei tulun Ministériu Solidaridade Sosiál no Inkluzaun (MSSI) atu oinsá fó apoiu ba populasaun sira ne’ebé daudaun ne’e sei moris iha pobreza nia laran.

Alvu ba levantamentu dadus ne’e maka eis prizóneiru ne’ebé vulneravél, ferik katuas abandonadu, feto risku sosiál ekonómika, família ki’ak, família ho uma laiha kondisaun atu hela, vítima dezastre naturál, labarik ne’ebé hala’o moris iha dalan, komunidade LBTI no labarik orfanatu sira.

Jornalista: Celestina Teles

Editór: Agapito dos Santos