PPN apela joven sira kontribui ba pás no estabilidade
DILI, 18 agostu 2023 (TATOLI)—Prezidente Parlamentu Nasionál (PN), Maria Fernanda Lay, apela ba joven sira iha atu kontribui ba pás no estabilidade iha rai-laran.
Notísia Relevante: PNTL detein suspeitu na’in-hitu prodús Bomba Molotov atu ataka PSHT
“Estabilidade seguransa iha rai-laran importante tebe-tebes. Se joven sira ezije kampu traballu para labele sai, estabilidade tenke iha, la’ós laiha serbisu ita ba baku malu. Nune’e, apela ba joven sira atu tur hakmatek iha uma prienxe ho serbisu barak ne’ebé ita bele halo, tanba ita ba baku malu laiha benefísiu,” Prezidente PN ne’e hateten ba jornalista sira iha uma fukun PN, sesta ne’e.
Lidér órgaun soberania daruak hato’o apela ne’e ba joven sira, tanba ikus-ikus ne’e mosu provokasaun tuda malu entre joven sira iha kapital Dili, nune’e husu atu kontribui ba pás no estabilidade.
Nia dehan, ho situasaun seguransa ne’e mós lori nia impaktu boot tebes ba ema investidór atu investe iha rai-laran
“Se mak hakarak mai investe iha rai-laran presiza seguransa di’ak, espera katak joven sira maiória estudante hodi hanoin ba destinu nasaun ba oin. Tanba, laiha estabilidade sei laiha ema hosi li’ur mai investe iha rai-laran,” nia hateten
Jornalista : Nelson de Sousa
Editór : Cancio Ximenes
