‘Abandonadu’, PR sei konstrui uma ba oan-ki’ak tolu iha Mabelis-Leber
BOBONARO, 19 agostu 2023 (TATOLI)-Inan mate ona. Maun mota lori. Aman soe hela. Moris “abandonadu’ mesak, Prezidente Repúblika (PR), José Ramos Horta sei konstrui uma ba oan-ki’ak na’in tolu, iha Aldeia Mabelis, Suku Leber, Postu administrativu Bobonaro, Munisípiu Bobonaro.
Tuir Xefe Estadu, labarik na’in tolu ne’e presiza hetan apoia duni, tanbá hela mesak iha uma la iha kondisaun no ina-aman ne’ebé halo sira koñese mundu ne’e mós oras ne’e la responsabliza ona ba sira-nia moris.
Labarik na’in tolu ne’e feto hotu hanesan Madalena Moniz, Cesaltina Moniz, no Madelana Moniz, hosi sira na’in tolu ne’e nain rua mak daudaun ne’e kontinua hela estudu iha Ensinu Bazíku Filiál (EBF) Mabelis.
“Ida ne’e kuitadu! Ida ho tinan 10 de’it. Ida fulan 11, ida tinan haat. Nia bin mak éroi hodi tau-matan ba sira. Nia maun mota lori. Nia mãe mate. Nia pai nakarten; sentidu família laiha halai tiha ba Zumalai. Ne’e la’ós ohin de’it mak fó ajuda, dala rua ka tolu ona. Ita sei hare depois sei hadia uma di’ak ida ba sira na’in tolu,” Horta hateten ba jornalista sira, iha sábadu ne’e, bainhira hamutuk komitiva no autoridade munisípiu Bobonaro hodi fó apoia neseidade bazíka no hare direita kondisaun, problema ne’ebé oan-ki’ak na’in tolu ne’e hasoru.
Iha vizita refere, tuir Xefe Estadu la’ós haree de’it labarik na’in tolu ne’e maibé fó mós apoia umanitária ba komunidade vunerával sira iha aldeia ne’e.
“Ajuda uituan-uituan ne’e mai ona maski la’ós Prezidente Repúblika nia kna’ar. Buat ne’ebé ha’u halo ne’e governu, Ministériu Solidariedade Sosiál nia kna’ar, maibé prezidente lakohi hein fali governu atu ajuda. Hein beibeik, dudu, duun ba governu entaun imi sei la hetan ajuda ruma. Tanba ne’e mak prezidente halo daudaun ona buat ruma,” nia hateten.
Sasan sira ne’ebé apoia hanesan pakote nesesidade bázika; fós ne’ebé iha modelu rua saka ida Prezidensia Repúblika mak sosa rasik no saka ki’ik ne’ebé ba labarik sira ne’e Xefe Estadu nia amigu sira iha Malázia mak apoia hodi oferese ba komunidade sira.
Alende ne’e, distribui mós sepatu ba labarik sira ne’ebé apoia hosi Premiadu Noveda da Paz ne’e nia amigu sira hosi Koreia.
“Sepatu ne’e kualidade di’ak. Ne’e hosi Fábrika Samsung sira mak oferese lubuk ida. Kaisa atus ba atus que mai iha Dili entrega ba komunidade sira. Ne’ebé, ita agradese ba Samsumg no hau-nia amigu sira iha Malázia,” nia agradese.
Sorin seluk, Xefe suku Leber, Joanico da Silva, agradese ba Prezidente Repúblika, José Ramos Horta, ne’ebé ho laran-luak fó apoia ba nia komunidade sira liu-liu ba oan-ki’ak na’in tolu ne’e.
“Labarik na’in tolu ne’e hasoru dezafiu oioin tanba kuaze tinan 10 ida hanesan, ninia inan mate. Aman sei iha maibé aman ne’e nia sai buka osan la fila to’o agora. Nia hola feto tiha iha rai Tora-Ikun Zumalai. Nia soe hela labarik na’in tolu ne’e, sofre maka’as tebe-tebes. Buka hahan rasik. Kaer to’os rasik,” nia haktuir.
Notísia Relevante: Komunidade Leber halerik Eletrisidade – Estrada, PR sei hato’o ba Governu
Jornalista: Sergio da Cruz
Editór: Rafael A Ximes Bello
