iklan

EKONOMIA, BOBONARO, MUNISÍPIU

Komunidade Leber halerik Eletrisidade – Estrada, PR sei hato’o ba Governu

Komunidade Leber halerik Eletrisidade – Estrada, PR sei hato’o ba Governu

Prezidente Republika,Jose Ramos Horta,koalia hela ho xefe suku Leber,postu administrativu Bobonaro,munisipiu Bobonaro,Joanico da Silva,imagen Tatoli/Sergio da Cruz

BOBONARO,19 agustu 2023 (TATOLI)-Prezidente Repúblika (PR), José Ramos Horta, sábadu ne’e, rona no haree direta problema no preokupasaun komunidade suku Leber, Postu administrativu Bobonaro, munisípiu Bobonaro.

 

Iha vizita ne’e, komunidade sira liuhusi Xefe Suku Leber, Postu administrativu Bobonaro, munisípiu Bobonaro, Joanico da Silva, hato’o ba Xefe Estadu katak durante tinan 20 resin komunidade iha suku ne’e halerik teb-tebes ba estrada liu-liu eletrisidade tanba abitante 10% de’it mak foin asesu.

 

“Ha’u-nia komunidade 90%, iha aldeia haat hanesan Leber-Taz, Mabelis, Holbese no Holsa-Taz até à data ami seidauk asesu ba eletrisidade durante ukun-aan 21 anos ona. Suku Leber sei tuur iha nakukun laran tanba agora daudauk komunidade barak, uma uza kami hodi hetan naroman iha tempu kalan,” autoridade lokál ne’e relata situasaun no kondisaun komunidade ne’e ba PR.

 

Lideransa komunitária ne’e hatutan, kondisaun estrada hahú hosi liña jerál ligasaun hosi Maliana ba postu Loloto’e to’o Covalima mai to’o suku ne’e grave teb-tebes iha tempu udan.

 

“Ami-nia komunidade sira atu lori produtu lokál asesu iha tempu bailoron, liuliu tempu udan susar tebes atu lori ba merkadu Bobonaro no merkadu Maliana tanba ne’e ami hato’o ba sua exelénsia bele koopera Ministériu Obras públiku hodi bele haree mós ami-nia kondisaun ne’e,” nia rekomenda.

 

Hatan ba prekupasaun komunidade sira nian, Prezidente Repúblika kompromete katak sei hato’o relatóriu vizita ba Governu no ko’alia ho Primeiru-ministru, Kay Rala Xanana Gusmão no membru governu sira ne’ebé mak relevante hanesan Ministru Obras Públika (MOP), Samuel Marçal no Vise-primeiru Ministru Koordenadór Asuntu Sosiál no Ministru Dezenvolvimentu rurál no Abitasaun Urbana, Mariano Sabino ‘Assanami’.

 

“Ha’u sei hato’o ba sira haree to’ok oinsá bele hadi’a uluk nanain iha Estrada. Ha’u mós rona ita-boot sira hateten eletrisidade laiha, ha’u sei husu para tenke dada duni eletrisidade mai,” Xefe Estadu hateten iha Aldeia Mabelis.

Tuir dadus, abitante ne’ebé seidauk asesu eletrsidade hamutuk 1,432 ho nia totál uma-kain hamutuk 295.

Notísia relevante: Uma-kain 273 iha suku Leber seidauk asesu eletrisidade

Apresia ho vizita PR

Entretantu, Autoridade lokál no komunidade apresia no agradese Prezidente Repúblika (PR), José Ramos Horta tanba maske kondisaun Estrada la di’ak maibé disponibiliza tempu hodi to’o direita iha suku Leber atu haree direita dezenbolvimentu iha suku ne’e.

Abitante aldeia Mabelis, Suku Leber, Estevão dos Santos, konsidera vizita Xefe Estadu ne’e supreza teb-tebes ba komunidade sira tanbá durante ne’e nai-ulun sira seidauk haree direita konidisaun iha área rurál ne’e.

“Ami kontenti no apresia ho Prezidente nia vizita direita ami-nia aldeia. Ohin, prezidente haree ona estrada la di’ak, no promote ona atu eletrisidade seidauk iha, ami fiar katak tempu badak ahi bele lakan no estreda mós sei di’ak. Ami mós husu ba ministériu relevante atu tempu-badak haree promesa prezidente nian ne’e tanba tinan barak ona ami hela iha nakukun laran de’it,” nia hato’o.

Notísia relevante:Aldeia haat iha Leber halerik enérjia eltérika

Jornalista: Sergio da Cruz

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!