BOBONARO, 07 abríl 2022 (TATOLI) – Komunidade iha suku Leber, postu administrarivu Bobonaro, munisípiu Bobonaro hamutuk uma-kain 278 seidauk aseseu enérjia eletrisidade.
Suku leber iha aldeia lima ho totál uma-kain 340, maibé hosi númeru ne’e aldeia Butu ho totál uma-kain 67 foin mak asesu eletrisidade iha tinan 2013 tanba área refere hela besik kedas liña distribuisaun jerál ba postu administrativu Lolotoe 1642 totál populasaun
“Ha’u-nia komunidade ne’e aldeia haat mak seidauk mak hanesan aldeia Leber Taz ho totál uma-kain 121, Holsa Taz totál uma-kain 57, aldeia Holbese totál uma-kain 35, aldeia Mabelis ne’e totál uma-kain 60. Sira-ne’e mak tinan 20 resin ona hela iha nakukun laran,” Xefe suku Leber, Joanico da Silva, informa ba Tatoli, iha Maliana, kinta ne’e.
Nia haktuir, durante ne’e komunidade sira mehi hakarak tebes asesu eletrisidade hodi obriga líder komunitária sesante sira mai to’o agora hato’o proposta ba Ministériu Obra Públika (MOP) no ba direitamente Eletrisidade Timor-Leste, Empreza Públika (EDTL,E.P) maibé to’o agora laiha resposta hosi entidade hirak-ne’e.
Problema ne’e mós difikulta estudante sira atu estuda iha tempu kalan no komunidade sira susar atu akompaña imformasaun rai laran no rai-li’ur liu hosi kanál tádiu no televizaun nasionál sira.
“Ami ho komunidade sira to’o agora triste nafatin tanba ita ukun an ona mais kalan-kalan ami tuur de’it iha nakukun laran,” nia katak.
Jornalista : Sérgio da Cruz
Editór : Evaristo Soares Martins
