BOBONARO, 20 agustu 2023(TATOLI)-Prezidente Repúblika, José Ramos Horta, husu ba FALINTIL-Forsa Defeza Timor-Leste (F-FDTL), atu halo kontrola maka’as ba atividade peska ilegál ne’ebé oras ne’e kontinua buras iha área tasi Timor-Leste nian.
José Ramos Horta hato’o preokupasaun ne’e durante komemorasaun loron FALINTIL-Forsa Defeza Timor-Leste (F-FDTL) ba dala 48, iha aldeia Odelgomo, suku Ai-Asa, postu administrativu Bobonaro, munisípiu Bobonaro, dominggu ne’e.
Notísia Relevante :PR konsidera presiza kria kondisaun di’ak ba Komponente Navál hodi asegura tasi
Nia dehan liuhosi kooperasaun ne’ebé maka Timor-Leste estabelese ona ho Austália iha área defeza nian maka iha fulan-outobru 2023 nian rohan, Austrália sei fó apoiu ró patrulla Guardian ba Komponente Navál F-FDTL hodi kontrollu ba iha tasi Timor-Leste.
Tuir relatóriu ne’ebé TATOLI asesu husi Komponente Navál katak iha dezembru tinan 2022 liubá liuhosi liuhosi sistema detesaun automátika Skylight ne’ebé Komponente Naval iha, konsege deteta iha ró hamutuk 60 mak halo peska ilegál, iha ita-nia tasi Kosta Súl Timor-Leste. Ró 60 ne’ebé halo atividade peska ilegál hosi nasaun viziñu sira hanesan Thailandia no Vietname.
No mós bazeia ba dadus hosi Governu liuhosi Ministériu Agrikultura no Peska (MAP), iha tinan 2018 deteta ró peska ilegál hamutuk unidade 107 mak tama tasi Timór hodi na’ok ikan ho kunatidade tonelada 223 ne’ebé koverte ba osan karik kuaze millaun $1.
Enkuantu, iha tinan 2019, MAP identifika ró unidade 67 mak tama iha tasi timór halo atividade peska ilegál, ne’ebé ikan lakon hamutuk tonelada 100-resin, konverte ba osan hamutuk $800.000.
Nune’e iha komemorasaun loron FALINTIL-FDTL ba dala-48 ne’e, Horta hateten ho apoiu ró hosi Austrália ne’e sei tulun Timor-Leste atu kombate atividade peska ilegál iha zona ekonomia espesiál (ZEE) Timor-Leste nian no mós esplorasaun minarai iha tasi Timor.
“Tenke kontrola tasi ne’ebé iha ita-nia juridisaun, hodi fó garantia no seguransa kona-ba esplorasaun ba ita-nia rekursu petrolíferu, minerál, enerjétiku, biolójiku no ambientál, liuliu iha momentu ne’e bainhira ita hakat ba dezenvolvimentu esplorasaun iha rai-laran (onshore) no iha tasi (offshore), hodi hanoin boot ba projetu TASI-MANE nomós GREATER SUNRISE,” Xefe Estadu reforsa.
Tuir nia ho prezensa ró patrullamentu ne’e mós atu tulun sidadaun sira bainhira hetan dezastre iha tasi laran nune’e bele hetan salvasaun lalais.
“Ita tenke fiar maka’as, hanesan fiar atu bele taru, kona-ba meius no rekursu umanu liu oin ida atu fó seguransa la’ós de’it ba ema no sasán, maibé hodi fó tulun ba ró, pasajeiru no mariñeiru sira iha susar nia laran, bainhira iha asidente ruma ka hasoru hahalok a’at kontra ita,” Horta hateten.
Konba defeza no seguransa marítima Horta, dehan presiza koloka kestaun seguransa ba infraestrutura, ekipamentu no materiál, ne’ebé presiza koidadu bainhira uza no halo manutensaun, konservasaun, hadi’a, no buka beibeik hodi hametin rekursu operasionál ne’ebé uja iha tempu naruk.
“Iha hala’ok boot iha ita-nia oin no haka’as ami hodi halo investimentu di’akliu iha parte militár hanesan servisu apoio nian, no la’ós de’it ho ofisina enjiñaria sivil espesializada, karpintaria, kanalizasaun, elektrisidade, maibé hari’i mós kapasitasaun teknolojia atu bele hatán ba ekipamentu ne’ebé iha teknolojia avansadu tebes,” Premiadu nobél ba páz ne’e hateten.
Konabá meius modernidade F-FDTL nian maka Prezidente Repúblika husu atu haklean liután koperasaun estratéjika ne’ebé hetuur tia ona iha nível bilaterál kona-ba lala’ok iha rai, tasi no aviasaun mós, ho nasaun sira ne’ebé TL estabelese ona ninia kooperasaun hanesan Austrália, Xina, Estadus Unidus Amérika, Indonézia, Malázia ka Nova Zelándia ka Portugal.
Timor-Leste fiar metin mós ba dezenvolvimentu komponente áero bainhira ita hadi’a no hafoun Aeroportu Internasionál Baucau ho infraestrutura hodi halo hanesan aeródromo militár ida ekipadu ho servisu no valénsia hirak-ne’ebé banati tuir hosi Organização Internasionál da Aviação Civil (ICAO).
“Ho tulun hosi koperasaun Militár Amerikana, daudauk ne’e, hala’o hela intervensaun ida hodi tau infraestrutura aeroportuária ne’ebé sei halakan kampu aviasaun ho torre kontrolu nomós ho terminál di’ak ba pasajeiru sira, ho servisu manutensaun ba aviaun ho korpu bombeiru ba kazu emerjénsia ne’ebé mosu baibain iha operasaun aérea,”Nia hatutan
Nia hatutan Kapasidade áero ne’e bele uza bainhira hamosu emerjénsia, atu hatán no fó tulun ba populasaun bainhira akontese kalamidade ka dezastre naturál iha tinan-2021, hafoin SIKLONE SEROJA no seluk tan.
“Ha’u fiar metin katak neineik-neineik ita sei iha kapasidade ho kbi’it atu kontrola espasu áero nasionál, maibé atu hola parte integradu mós iha sistema fiskalizasaun nasionál no internasionál, hodi hatán ba kompromisu ne’ebé halo tiha ho ASEAN iha nível bilaterál ho ita-nia viziñu sira,”
Maske TL seidauk dezenvolve ninia transporte áero hodi tulun populasaun sira iha situasaun emerjénsia no dezastre boot sira iha tinan hirak liubá maibé Kompañia Santos maka tulun elikóptru hodi distribui apoiu umanitária ba komunidade sira ne’ebé afetadu maka’as hosi dezastre naturál.
“Iha momentu emerjénsia ne’ebá, tanba seidauk iha komponente áero nasionál, ita hetan ajuda ho elikópteru kontratadu hosi Empreza Petrolífera Santos nomós apoiu finanseiru hosi Governu Australianu,”Xefe Estadu informa
Iha situasaun COVID-19 Timor-Leste afetadu maka’as, no ita depende maka’as ba meius áero hosi rai-li’ur tanba ne’e Timor-Leste presiza halo investimentu iha setór importante ida-ne’e, ba defeza nasionál nomós dezenvolve ita-nia ekonomia.
Notísia Relevante :FOTO ATUÁL: Inaugurasaun Sentru Operasionál Marítima iha Komponente Navál
Jornalista: Sérgio da Cruz
Editór: Agapito dos Santos
