Komisaun B husu komandu PNTL halo edukasaun sívika ba membru sira
DILI, 21 agostu 2023 (TATOLI)—Membru Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Deputadu Natalino dos Santos, husu ba komandu Polísia Nasionál Timor-Leste (PNTL) atu hala’o edukasaun sívika ba membru sira hodi hala’o kna’ar tuir de’it lei no orden.
Notísia Relevante: Xanana husu PNTL serbí de’it povu, labele halo atividade polítiku
“Bolu atensaun ba komandu, liuliu kada komandante ba nia membru hatene ona ninia responsabilidade/ Nu’udar polísia ne’e atu halo saida, nu’udar polísia atu hala’o nia kna’ar kumpre orden no lei. Tuir lema ne’ebé iha sira nia kbaas katak sira só mantein lei no orden iha rai ida-ne’e. Tanba ne’e, husu polísia sira labele envolve iha atividade polítika no arte marsiál, entaun ami mós bolu ona atensaun ba komandu PNTL tau atensaun komesa halo edukasaun sívika, sensibiiza polísia para kumpre orden no lei, sira kumpre de’it lei ho orden,” Deputadu membru komisaun B ne’e hateten ba jornalista sira iha uma fukum PN, segunda ne’e.
Nia apresia, Primeiru-Ministru semana kotuk hala’o vizita ba PNTL iha akadémia polísia Comoro hodi hato’o enkoraja tebes no atu halo inspesaun hodi fó hanoin serbi povu de’it hala’o kna’ar tuir de’it lei no orden, bele garante seguransa ba povu no nasaun labele hala’o atividade polítika.
“Klaru kna’ar Polísia Nasionál Timor-Leste mak atu mantein orden no lei, ne’e lema ida tau iha sira-nia kbaas no iha sira-nia ulun atu bele kumpre. Katak, só mantein lei no orden, PNTL atu serbi de’it povu no rai ida-ne’e. Tanba ne’e, apresia tebes vizita Primeiru-Ministru ba iha PNTL ne’e atu enkoraja ita-nia polísia sira atu hala’o kna’ar ho profísionál,” nia hateten.
Tanba, tuir nia, PNTL hanesan instituisaun independente no imparsiál atu garante seguransa interna rai-laran nian liuliu atu fó garantia ba sidadaun situasaun hakmatek no konfiansa ba povu, nune’e bele iha estabilidade, pás hodi bele hala’o dezenvolvimentu nasaun.
Membru PN ne’e enkoraja membru PNTL sira atu labele inklina an ba atividade polítiku no organizasaun arte marsiál, tanba sira-nia organziasaun mak instituisaun polísia no PNTL hanesan instituisaun indepedente atu hakuak povu hotu.
PNTL iha estatutu no orgánika rasik ne’ebé define tiha ona, fila ba komandu instituisaun ne’e iha nia kontrolu, nune’e nia fiar katak instituisaun ne’e tinan 20 ona organizadu tebes profisionál ona.
“Agora ita bolu atensaun nafatin observasaun públika nafatin hala’o ba sira no avaliasaun para dezempeñu sira-nian ne’e di’ak-liu, ha’u fiar polísia ida profisionál tebe-tebes no ita apresia ba sira. Tanba, ita foin liu eventu boot rua eleisaun prezidensiál no parlamentár situasaun la’o normal, hatudu PNTL ne’e iha profisionalizmu, Tanba ne’e, enkoraja sira polísia ne’e ba oin sai polísia ida sai profisionál liután,” nia hateten.
Jornalista : Nelson de Sousa
Editór : Cancio Ximenes
