iklan

NASIONÁL, HEADLINE, SEGURANSA

Xanana husu PNTL serbí de’it povu, labele halo atividade polítiku

Xanana husu PNTL serbí de’it povu, labele halo atividade polítiku

Primeiru-Ministru, Kay Rala Xanana Gusmão, komprementa ajente no ofisiál superiór PNTL durante vizita iha Sentru Formasaun Akademia Polísia, Comoro, kinta (17/08/2023) . Imajen Tatoli/António Daciparu

DILI, 17 agostu 2023 (TATOLI)–Primeiru-Ministru (PM), Kay Rala Xanana Gusmão, halo vizita ba Sentru Formasaun Akademia Polísia, Comoro, kinta ne’e, hodi hato’o mensajen ba membru Polísia Nasionál Timor-Leste (PNTL) hosi ajente to’o ofisiál superiór.

Biban ne’e, Xanana husu nu’udar membru Polísia, FALINTIL-Forsa Defeza Timor-Leste (F-FDTL), inklui instituisaun Estadu hanesan justisa labele mete partidu ka inklina-an iha polítika maibé kumpre de’it misaun.

“Mai hasoru imi (PNTL) la’ós atu kastigu imi, maibé atu fó hanoin ba imi hotu katak, iha Estadu Direitu Demokrátiku, Polísia, Militár, no instituisaun justisa tenke iha hanoin metin ida atu orienta sira-nia servisu. Prinsipiu ne’e maka atu serbí de’it povu no rai ida-ne’e,” PM Xanana hateten iha Sentru Formasaun Akademia Polísia.

Xefe Governu halo vizita ligadu ho informasaun no keixa balun katak membru PNTL balun durante ne’e inklina-an iha vida polítika.

“Membru Polísia, Forsa no instituisaun balun iha Estadu Direitu Demokrátiku labele sadere ba partidu ida. Ida-idak nu’udar sidadaun bele iha ninia eskolla, hili ida ne’ebe, gosta ida ne’ebé no fiar ida ne’ebé maibé liliu Polísia ho Forsa labele abertamente tama iha partidu no polítika. Presiza tebes independénsia iha instituisaun sira ne’ebé defende povu tomak hanesan Polísia, Forsa no instituisaun justisa. Instutuisaun tolu ne’e hamriik atu serbí rai  no povu ida-ne’e, independentimente sé de’it iha kor, relijiaun no hanoin nu’udar sidadaun Timor,” nia akresenta.

Notísia relevante : PNTL asegura na’in-lima ne’ebé provoka hafoin graduasaun PSHT iha Tibar

Xanana sente triste tebes bainhira rona katak ajente PNTL nian forsadu ou livre vontade ba hamutuk ho partidu ida.

“Ne’e ladi’ak, kuandu hanesan ne’e ema ida, laiha sidadaun ida maka bele fiar ona imi. Imi tenke independente, iha imi-nia fuan imi hakarak partidu A ka gosta partidu B maibé iha imi-nia atitude nu’udar ajente PNTL imi la pertense ba partidu ida, la halo polítika, ne’e duni ohin ita hasoru malu atu kurije tiha buat ida-ne’e,”nia fó hanoin.

Tuir Xefe Governu, iha Estadu Direitu Demokrátiku, desizaun ikus mak iha povu, katak povu hili mak ba tuur iha Governu, ne’e desde tinan 2002, katak povu fó fiar mak ba kaer ukun, ukun sala povu la fó fiar pasiénsia sai ne’e mak dehan Estadu Demokrátiku, Direitu ne’e kona-ba lei, katak lei impede polísia, Militár ho instituisaun justisa atu tama iha polítika.

“Tanba eroi sira ne’ebé mate ba rai ida-ne’e la husu buat ida, agora imi balun foin sa’e maka’as loos labele haluha sakrifísiu ne’ebé povu halo, povu ne’ebé imi mai hosi ne’ebá. La’ós sira ne’ebé mártir no ne’ebé terus ne’e la’ós ema seluk maibé ita-nia eroi sira, hodi sira-nia luta mak hodi imi sira sai ajente ka ofisiál iha Polísia. Sira fó misaun ida-ne’e ba imi atu serbí no protezje. Tanba ne’e ohin ita presiza duni ko’alia ida-ne’e iha públiku, se ita ko’alia halimar de’it uma laran ne’ebá povu sei sente diskonfia hela hotu, nune’e povu lakohi hatene sé de’it maibé sira hakarak hatene nu’udar Polísia no instituisaun ita tenke hapara hahalok ne’ebé povu sente katak nia labele ona fiar Polísia,” nia tenik.

PM sei la julga membru Polísia sé de’it maibé husu responsabilidade ba Komandante boboot sira, la husu atu hakneak iha públiku, la husu atu halo deklarasaun iha públiku maibé nu’udar Primeiru-Ministru sei tau-matan, sei haree hahalok sira hotu hosi ohin ba oin, bainhira nafatin akontese maka sei husu atu retira nu’udar membru Polísia ida.

Tanba ne’e, Primeiru-Ministru hakarak lori hikas membru sira ne’e la’o tuir dalan loos hodi manán fali povu nia konfiansa.

Xanana mós husu ba membru PNTL hotu atu haluha tiha buat ne’ebé akontese iha tempu sira liubá no hahú ba oin tenke kumpre de’it servisu hodi serbí povu no nasaun.

“Tanba ita hotu hamutuk atu kontribui ba povu nia di’ak, pás ba dezenvolvimentu rai ida-ne’e,” nia reforsa.

Hafoin hato’o tiha mensajen ba membru sira iha ámbitu formatura, Xefe Ezekutivu halo reuniaun kuaze oras ida ho Komandante PNTL munisípiu hotu no komandante Unidade sira.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!