VIQUEQUE, 22 agostu 2023 (TATOLI)—Diretór Programa Nasionál Dezenvolvimentu Suku (PNDS) munisípiu Viqueque, Higinio Posinato Zamor e Silva, hateten, ekipa daudaun ne’e enfrenta menus forsa traballu hodi halo kontrolu implementa programa ne’ebé la’o.
“Iha programa Uma Naroman povu (UNP), dada bee-moos no hadi’a estrada iha suku laran, maibé agora obstákulu ne’ebé ita hasoru daudaun mak forsa traballu. Nune’e atu kontratu ema maka difísil ba ami tanba programa ne’e implementa hotu iha suku 36 Viqueque,” Diretór informa ba Agência Tatoli, iha ninia knaar fatin, tersa ne’e.
Nia dehan, progresu konstrusaun UNP iha Viqueque balun atinje ona 80%, 90% no balun seidauk, tanba menus rekursu, nune’e ekipa PNDS susar rekolla ninia persentajen no kontrola kualidade obra.
“Atu tau matan ba serbisu ne’e ema hosi tékniku no finansa, maibé área rua ne’e agora la funsiona hotu, oinsá maka sira bele ba haree programa sira-ne’e. Sé maka atu haree, ita dehan kualidade ema tenke kontrola, agora ita garante ba kualidade mai hosi ne’ebé? Nune’e agora ha’u orienta tékniku no kontabilista sira iha munisípiu maka ba kontrola, maibé labele haree hotu tanba programa barak liu. Ami atu atualiza ninia progresu serbisu sira mós labele, uluk ami sempre atualiza kada semana rua, maibé agora labele tanba menus traballadór,” nia akresenta.
Notísia relevante : PNDS Viqueque sei implemeta projetu bee-moos hamutuk 21
Maski limitasaun traballadór, PNDS kontinua tenta hodi tau matan ba programa sira hanesan konstrusaun UNP, dada bee-moos, reabilitasaun sede suku no dalan atu prosesu bele la’o nafatin.
“Ita atu haree progresu kada obra, maibé ami labele kontrolu hanesan ne’e, tanba difikuldade seluk maka dalan, entaun ami labele to’o iha fatin konstrusaun sira. Ha’u hanoin serbisu sira ne’e finaliza tiha maka redús forsa traballu karik ha’u sente di’ak, maibé serbisu la’o hela maka redús ne’e difikulta fali ba prosesu kontrusaun sira,” Diretór hato’o.
Rekrutamentu traballadór PNDS hosi nasionál, enkuantu parte minisípiu labele foti desizaun ruma.
Daudaun traballadór kontratadu PNDS Viqueque hamutuk na’in-50, maibé Governu hapara ona ema na’in-28 no daudaun hela traballadór na’in-22
Munisípiu Viqueque benefisia UNP hamutuk 365 no projetu dada bee-moos 21.
PNDS hetan alokasaun hamutuk millaun $1,8 tinan 2023, ba implementasaun PNDS-Regular millaun $1,8 no PNDS-RSS rihun $52.
Ba UNP hetan alokasaun millaun $4,9, ba implementa tipu UNP-regular millaun $1,9, UNP-Plus A millaun $2 no UKL-Plus B rihun $976.
Jornalista : Vitorino Lopes da Costa
Editora : Julia Chatarina
