Feto 14 iha Oé-Cusse kompete soru-tais hodi promove no valoriza produtu lokál
OÉ-CUSSE, 23 agostu 2023 (TATOLI – Feto na’in-14 iha Rejiaun Administrativa Espesiál Oé-Cusse Ambeno (RAEOA), kuarta ne’e halo kompetisaun soru-tais ho objetivu atu promove no valoriza produtu lokál sira iha Oé-Cusse Ambeno.
Kompetisaun ne’e realiza hosi Sekretáriu Rejionál ba Asuntu Komérsiu no Indústria hodi komemora loron Konsulta Popúlár 30 agostu 1999. Konkorrente feto na’in-14 ne’e, maioria estudante ho idade 10 to’o 20.
Notísia relevante: RAEOA loke feira ho atividade sia komemora loron FALINTIL no Konsulta Populár
Iha serimónia abertura kompetisaun ne’e, Prezidente Autoridade RAEOA, Arsénio Paixão Bano, hateten, orgullu, tanba konkorrente sira maioria joven, importante tebes atu koñese kultura Oé-Cusse nian.
“Ita agradese tanba joven sira hakarak partisipa iha kompetisaun ne’e, ida-ne’e orgullu boot ba ita hotu tanba ita hakarak promove ita-nia kultura, estudante sira presiza hatene ita-nia kultura Oé-Cusse,” Arsénio Bano ko’alia iha Jardin Oébau.
Nu’udar Oé-Cusse oan iha obrigasaun atu hatene nia kultura, ohin loron tamba ona era globalizasaun, modernu ema barak kuaze haluha ona nia kultura rasik, balu sai ema boot, maibé kultura ne’e prioridade primeiru.
“Ha’u husu ba juri sira, juri didi’ak ba, tanba ita atu promove ita-nia tais, ne’e só Oé-Cusse maka ita kontinua mantein promove ita-nia kultura tais ne’e, la presiza manán premiu maibe oinsa iha koñesimentu klean kona-ba prosesu halo tais ne’e hosi inisíu to’o remata ne’e persiza hatene, agradese ba estudante sira tanba hakarak envolve iha kompetisaun ne’e,” nia orgullu.
Sekretáriu Rejionál ba Asuntu Komérsiu no Industria, Pedro da Silva Boquifai, informa, konkorrente sira na’in-14, na’in-rua ho idade tinan 10, reprezenta mai hosi suku 18.
“Kompetisaun ne’e primeira-véz ita hala’o iha Oé-Cusse, ita sei kontinua iha novembru 2023 ne’e, karik iha posibilidade, no ami hakarak sei implementa iha sub-rejiaun sira, labele konsentra de’it iha Pante Makasar, nune’e bele envolve konkorrente barak-liután,” nia promete.
Entretantu, ekipa juri atu halo avaliasaun ba kompetisaun ne’e mai hosi Asosiasaun Feto Mudánsa Ekonomia Família (AFMEF), Redi Soru-Na’in Oé-Cusse no Sekretáriu Rejionál Komérsiu Indústria liuhosi Departamentu Indústria.
Kritéria ne’ebé aplika iha kompetisaun soru-tais ne’e, ho tipu rua, teoria no prátika, kona-bá teoria primeiru aprezenta identidade, esplika ekipamentu sira-ne’ebé uza atu halo tais, esplika kabas no prosesu soru-tais hahú inisíu to’o remata sai tais ida ho durasaun menutu lima.
Kona-bá prátika, kada konkorrente tenke prodús tais ida ho modelu koor tais logu ZEESM, no hakerek letra RAEOA-ZEESM TL iha tais nia klaran, prátika ne’e ho durasaun tempu durante oras lima nia laran, iha prosesu prátika ne’e la permite konkorrente sira atu halo diskusaun ka hetan apoia hosi inan-aman.
Notísia relevante:RAEOA abertura feira sirkula ekonomia no promove produtu lokál durante loron 21
Jornalista: Abílio Elo Nini
Editor: Evaristo Soares Martins
