Kondisaun saúde la permite, Prezidente Repúblika adia viajen ba Oé-Cusse
OÉ-CUSSE, 23 agostu 2023 (TATOLI – Prezidente Repúblika (PR), José Manuel Ramos Horta, kuarta ne’e adia viajen ba Rejiaun Administrativa Espesiál Oé-Cusse Ambeno tanba kondisaun saúde la permite.
Notísia relevante: Lia-na’in Oé-Cusse simu Prezidente Repúblika ho tradisaun kulturál
Novidade ne’e, hato’o liuhosi Prezidente Autoridade RAEOA, Arsénio Paixão Bano, iha ámbitu abertura formasaun akampamentu ne’eb’e organiza hosi organizasaun Permakultura Timor-Leste, (PERMATIL) iha aldeia Lakufoan, suku Costa, sub-rejiaun Pante Makasar, kuarta, 22 agostu ne’e.
“Ha’u atu informa ba ita hotu ne’bé ohin mai iha-ne’e, infelismente Prezidente Repúblika loloos ohin hamutuk ho ita iha Oé-Cusse, maibé labele mai tanba situasaun saúde ladún permite, maibé ita iha-ne’e, reprezenta nia (PR) ona, ita bele kontinua ita-nia ajenda,” Arsénio Paixão Bano, ko’alia iha aldeia Lakufoan.
Nia informa, ajenda ne’ebé Autoridade prepara ba Prezidente Repúblika, primeiru atu halo inaugurasaun ba eskola unidade tolu.
Primeiru atu inaugura Eskola Bázika Filiál (EBF) Ulaslama iha suku Taiboko, sub-rejiaun pante Makasar, inaugura mós EBF Faotkenfua iha suku Usitako, Nítibe no inaugura mós EBF Palsa miha, suku Malelat, sub-rejiaun Pássabe.
“Serimónia inaugurasaun ba eskola tolu ne’e, loloos Prezidente Repúblika halo inaugurasaun iha loron Segunda, 21 agostu ne’e, no tersa ne’e hamutuk ho ita iha Lakufoan, maibé tanba kondisaun saúde la permite, ikus mai kansela,” nia informa.
Notísia relevante: Autoridade RAEOA finaliza projetu EBF ida iha Ulaslama Taiboko
Jornalista: Abílio Elo Nini
Editór: Evaristo Soares Martins
