DILI, 23 agostu 2023 (TATOLI) – Ministériu Edukasaun inklui, iha tinan ida ne’e, dixiplina Tetun iha ezame nasionál ba estudante nonu no désimu segundu anu. Inkluzaun Tetun iha ezame ne’e hanesan referénsia ida ba ministériu atu prepara medida foun iha 2024 hodi dezenvolve dalen Tetun.
Tuir kalendáriu Ministériu Edukasaun, ezame nasionál ne’e sei realiza iha outubru, hahú iha loron 16.
“Ministériu Edukasaun hatama ona Tetun iha ezame nasionál ho intensaun tanba daudaun iha ona prosesu ida hakarak atu dezenvolve Tetun atu sai di’ak liután”, Mateus do Rosário afirma iha Vila Verde, ohin.
Koordenadór Gabinete Unidade Kurríkulu realsa tan katak iha kurríkulu edukasaun seidauk enkaixa Tetun iha laran no seidauk iha manuál ba alunu sira, maibé esforsu ministériu nian atu hahú uluk ho ezame nasionál ne’e hodi haree rezultadu saida maka estudante sira sei hatudu. Tanba liuhusi ezame ne’e mak ministériu bele halo konkluzaun ida atu buka meiu hodi aselera prosesu sira iha futuru.
Nia salienta katak ezame nasionál refere hamosu mós preokupasaun husi profesór sira tanba ba dahuluk Tetun inklui iha ezame nasionál no lamentasaun husi manorin sira ne’e pertinente tebes tanba seidauk iha manuál hanorin sobre dixiplina ne’e ba alunu sira.
Dirijente ne’e observa katak maneira ensinu ne’ebé kada eskola halo durante ne’e liga dixiplina refere tuir ida-idak nia hakarak, tanba laiha manuál ne’ebé maka ministériu kria atu uniformiza sistema ensinu ida ho loloos.
“Ita hahú iha tinan ida ne’e [inklui Tetun iha ezame]. Ita bele haree ba tinan oin atubele deskobre buat balun hodi ajuda ministériu kria medida foun hodi bele halo mudansa iha ita-nian kurríkulu”, katak.
Xefe Gabinete Apoiu Tékniku, Kanisius Elo, dehan iha Eskola Sekundária Jerál 12 Novembru hanorin ona dixiplina Tetun, maibé la bazeia ba manuál. Tanba ne’e maka parte eskola preokupa pergunta ida ne’ebé maka sira atu elabora hodi fó ba estudante sira iha ezame ne’e.
“Ami uza ami-nian maneira rasik. Agora maneira sira ami uza ne’e konserteza la uza iha eskola sira seluk. Iha ezame ne’e oinsá maka labarik sira atu tuir ho di’ak? Oinsá sira atu halo preparasaun? Matéria Tetun ida ne’ebé loos maka atu fó ba sira iha ezame nasionál ne’e?”, tenik.
Notísia relevante: INL realiza semináriu kona-ba utilizasaun dalen Tetun liuhosi atividade hakerek
Jornalista: Tomé Amado
Editora: Maria Auxiliadora
